Baıanaýylda kóktemgi mol sýdy tıimdi paıdalanýǵa arnalǵan lımandyq jerler iske qosyldy
PAVLODAR. KAZINFORM - Bul joba Aıdos, Bala Shiderti jáne Aşysý ózenderinen tasyǵan sý resýrstaryn ustap qalýǵa múmkindik beredi. Nátıjesinde lımandyq shabyndyqtan fermerler mal sharýashylyǵyna qajetti jemshóp qoryn shaýyp alady.
Baıanaýyl óńirinde qalpyna keltirilgen 6 myń gektardan astam lıman alǵash ret sýǵa tola bastady. Basty maqsat – lımandardyń tolyqqandy jumysyn qalpyna keltirip, jaıylymdardaǵy sý tapshylyǵynyń aldyn alý jáne jaıylmaly alqaptardyń ónimdiligin arttyrý.
- Buryn óńirde ónimdiligi kádimgi shabyndyqtardan 6–7 ese joǵary 9 jaıylmaly alqap bolǵan. Sońǵy ýaqytqa deıin olardyń tek úsheýi ǵana jumys istep turdy. Baıanaýyl lımandaryn qaıta jańǵyrtý – strategııalyq mańyzy bar sheshim. Bul joba jaıylymdarǵa sý jetkizip, mal sharýashylyǵyna qajetti jemshóp qoryn nyǵaıtady ári Aıdos, Bala Shiderti jáne Aşysý ózenderiniń sý resýrstaryn tıimdi paıdalanýǵa múmkindik beredi. Nátıjesinde 6 myń gektardan astam jer aýdannyń mal sharýashylyǵyn damytýǵa qyzmet etpekshi, - dep habarlady Pavlodar oblystyq ákimdiginen.
Qazirdiń ózinde 52 shaqyrymǵa jýyq bógetter qalpyna keltirilip, 30-dan astam gıdrotoraptar men avtomatty sý aǵyzý qurylǵylary ornatylǵan. Lımandy qaıta jańǵyrtý jumystary áli de jalǵasady.
Ótken jyly Pavlodar oblysynda 33 myń gektardan astam lıman sýlandyrylǵan bolatyn.
