Baıanaýylda qysqy týrızm ashyldy
PAVLODAR. KAZINFORM – Jasybaı, Sabyndykól jáne Toraıǵyr demalys aımaqtary jańa jyldyq demalys kúnderi týrısterdi kútip otyr.
Byltyr qysta Baıanaýyldyń qarly taýlaryn, qaraǵaıly ormany men tabıǵı eskertkishterin tamashalaýǵa 15 myńdaı adam kelgen. Al ótken jazda 170 myńnan astam demalýshyny qabyldaǵan Jasybaı, Sabyndykól jáne Toraıǵyr demalys aımaqtarynda qysqy týrızmge mán berilip otyr. Jalpy óńirde Baıanaýyl aýdanynynyń týrıstik áleýetin arttyrýǵa baǵyttalǵan birneshe ınvestıtsııalyq joba júzege asyp jatyr.
– Bul óńirge jyl on eki aı týrıster legi tolastamaıdy. Qazir munda 8 demalys orny turaqty jumys istep tur. Al jańa jyldyq demalys kúnderi saıahatshylar sany eselep artady degen boljam bar. Óıtkeni ınfraqurylym jyldan jylǵa jaqsaryp keledi, - dep habarlady Baıanaýyl aýdandyq ákimdiginen.
Baıanaýylda ataqty Qońyr Áýlıe úńgiri, Kempirtas, Toraıǵyr óńirindegi Sáken shyńy sııaqty biregeı tabıǵı eskertkishter ornalasqan. Bul jerlerge saıahatshylar úshin arnaıy týrıstik baǵyttar uıymdastyrylady. Týrısterge qolaıly jaǵdaı jasaý maqsatynda bıyl sapar ortalyǵynyń qurylysy bastaldy. Munda Baıanaýylǵa qatysty barlyq qajetti aqparat bir jerden usynylady.
Taǵy bir tanymal týrıstik baǵyt – Myrzashoqy taý-shańǵy kesheni. Bul uzyndyǵy 960 metrlik arqan joly bar demalys nysany. Ásirese ekstremaldy sport túrin unatatyndar úshin qyzyqty.
Eske sala keteıik, álemde Qońyr áýlıeniń segiz mekeni bar, sonyń biri Baıanaýylda ornalasqan.