Baıanaýylda qaraqurtqa qarsy hımııalyq óńdeý sharalary qolǵa alyndy
PAVLODAR. KAZINFORM- Baıanaýyldyń Toraıǵyrov aýyldyq okrýgi aýmaǵynda qaraqurttardy joıý jumystary bastaldy. Mamandar qaýipti jándikke qarsy hımııalyq preparattar qoldanýda.
Toraıǵyrov aýyldyq okrýgi aýmaǵynda «DEZUS-PVL» JShS qaraqurtqa qarsy hımııalyq zattarmen (Tsýnamı, EK) óńdeý jumystaryn júrgize bastady.
Bul týraly Baıanaýyl memlekettik ulttyq tabıǵı parkinen habarlady.
- Toraıǵyrov aýyldyq okrýginde aıryqsha qorǵalatyn jerlerden tys aýmaqtarda hımııalyq óńdeý júrgizilip jatyr. Baıanaýyl memlekettik ulttyq tabıǵı parkinde hımııalyq óńdeýge tyıym salynǵan. Qaraqurttardy jınap, órtep, analyq qaraqurttardy joıý arqyly bıologııalyq kúresý sharasy kóktemnen beri jalǵasyp jatyr,-dep málimdedi ulttyq parkten.
Buǵan deıin Baıanaýyldaǵy týrıstik oryndarda qaraqurt qaptap ketkeni týraly jazǵanbyz.
Qaýipti jándiktiń qaptaýyna baılanysty óńirde tabıǵı sıpattaǵy tótenshe jaǵdaı jarııalandy.
