Baıanaýylda qaraqurt qaptaýyna baılanysty tabıǵı sıpattaǵy tótenshe jaǵdaı jarııalanýy múmkin

PAVLODAR. KAZINFORM - Ulttyq park qyzmetkerleri Toraıǵyr kóliniń aýmaǵynda qaraqurttyń kóbeıip bara jatqanyna alańdaýshylyq tanytyp otyr. Qyzmetkerler olardy kún saıyn qolmen jınap, joıyp jatqanymen odan kelgen nátıje shamaly.

Baıanaýyl aýdanynyń ákimi Ardaq Kisentaev jergilikti ulttyq parktiń jáne tótenshe jaǵdaılar departamentiniń qyzmetkerlerimen birlesip, qaraqurttardyń mekendeıtin jerlerin zertteý úshin Toraıǵyr aýylyna bardy.

«Zerdeleý barysynda Toraıǵyr kóliniń boıyndaǵy shópter men ósimdikterdiń arasynan qaraqurt órmekshileri, jumyrtqalary, qabyqtary tabyldy. Pavlodar oblysynyń tótenshe jaǵdaılar departamenti tótenshe jaǵdaılardyń aldyn alý jáne joıý jónindegi komıssııanyń kezekten tys otyrysyn ótkizýge bastamashylyq jasady. Odan soń Toraıǵyr aýylynda qaraqurttyń taralýyna qatysty kezekten tys jıyn ótkizildi. Onda Baıanaýyl memlekettik ulttyq tabıǵı parkiniń ǵylym bóliminiń qaraqurttarǵa qarsy júrgizilip jatqan jumystary týraly baıandalyp, qaýipti jándiktiń ári taralýy boıynsha boljamdar men olardy joıý ádisteri qarastyryldy», - dep habarlady óńirlik Tótenshe jaǵdaılar departamentiniń baspasóz qyzmeti.

Qazirgi ýaqytta jaǵdaıǵa tolyqtaı taldaý júrgizilýde jáne qaraqurtpen kúres boıynsha jedel sharalar qabyldaý úshin Toraıǵyr aýylynda jergilikti aýqymdaǵy tabıǵı sıpattaǵy tótenshe jaǵdaı rejımin jarııalaý máselesi qaralyp jatyr.

Baıanaýyldaǵy týrıstik oryndarda qaraqurt qaptap ketkeni týraly buǵan deıin de jazǵanbyz.