Baıanaýylda qalyń qarǵa ombyqqan bulan beınetaspaǵa túsip qaldy
PAVLODAR. KAZINFORM – Pavlodar oblysynda bıyl bulandar jurt kózine jıi shalynyp júr. Mamandar janýarlardyń taýly jerdegi ormanǵa ábden jersingenin aıtady.
Áleýmettik jelide taý baýraıyndaǵy qalyń qarǵa keptelip turǵan bulannyń áserli vıdeosy tarady.
Bulandar qazirgi ýaqytta Baıanaýyl ulttyq parkine qarasty ormandy jerlerdi kóbirek mekendeıdi.
– Tuıaqty janýarlar ulttyq park aýmaǵynda kóbeıip, búginde sany 90-ǵa jýyqtaǵan. Aşylaýyt, qamysty, qoǵaly jerlerge jaıylǵandy, terektiń qabyǵymen, taýdaǵy arshamen qorektengendi unatady. Baıanaýyldyń Kúrkeli, Jaıaý Musa, Qarajar aýyldary mańyndaǵy bıik taýlarda, Jalańtós asýy men Myrzashoqyda, Qońyr áýlıe úńgiri mańynda jıi ushyrasady. Bul vıdeo Myrzashoqy mańynda túsirilgenge uqsaıdy. Bulandardyń bulshyq eti jaqsy damyǵan, óte áleýetti janýar. Ol kez kelgen qalyń qardy jaryp óte shyǵady. Bul jerde buta japyraqtarymen qorektenip, kúıis qaıyryp nemese tynystap turýy múmkin, - dep habarlady Kazinform tilshisine ulttyq parktiń aǵa ınspektory Altynbek Qurmanov.
Ormanshylardyń aıtýynsha, atalǵan jabaıy janýardyń shoqtyǵynyń bıiktigi 2 metrge jetedi, salmaǵy 600 kelige jýyqtaıdy. Túsi qysta qara qońyr, jazda qońyrqaı, basy, aıaǵy aqshyldaý keledi. Aldyńǵy aıaqtaryndaǵy tuıaqtary ótkir, bul qorǵaný kezinde qarý retinde qoldanýǵa múmkindik beredi. Atalyǵynyń úlkeninde sheńber tárizdi múıizderi bolady.
Baıanaýyl ormandarynda emin-erkin jaıylyp júrgen bulandar beınetaspaǵa buǵan deıin de túsken.