Baıanaýylda eýropalyq úlgide jabdyqtalǵan júzý basseıni bar tuńǵysh sport kesheni ashyldy
PAVLODAR. KAZINFORM – Baıanaýyl aýdanynyń ortalyǵynda quıylmaly júzý basseıni bar zamanǵa saı dene shynyqtyrý-saýyqtyrý kesheni iske qosyldy. Ǵımaratqa bir mezgilde 100-den astam adam kele alady.
Jalpy aýmaǵy 4,5 myń sharshy metrden asatyn sport ǵımaratynyń ereksheligi basym. Munda jattyǵý zaldary, boks, kúres, ústel tennısi, voleıbol, basketbol zaldary, shaǵyn fýtbol, strıtbol alańdary bar. Buǵan qosa sadaq atýǵa, ıntellektýaldyq oıynǵa arnalǵan jáne taǵy da basqa zaldar ornalasqan.
Eń bastysy, Baıanaýyl aýdanynyń sporttyq ınfraqurylymynda táýelsizdik jyldarynan beri alǵashqy júzý basseıni ashylyp otyr. 25h11 kólemdi, 4 jolaqty basseın kent turǵyndarynyń barlyǵy úshin qoljetimdi bolady. Onyń qurylysyna zamanǵa saı materıaldar paıdalanylyp, eýropalyq úlgidegi jabdyqtar ornatylǵan. Sý quıylmaly júıemen únemi aınalyp turady. Mundaı basseınder uzaq jylǵa shydaıdy ári sýǵa túsýshiler úshin barynsha qaýipsiz.
Keshenniń ashylýyna Pavlodar oblysynyń ákimi Asaıyn Baıhanov qatysyp, baıanaýyldyq jurtshylyqty kópten kútken ıgilikpen quttyqtady.
– Memleket basshysy Qasym-Jomart Toqaev halyqtyń ómir súrý sapasynyń jaqsarýy jáne jastardyń salaýatty ómir saltymen shuǵyldanýy – basty mindetterdiń qatarynda ekenin aıtqan. Ulylardyń mekeni, qaımaǵy buzylmaǵan Baıanaýyl jerinde osyndaı tamasha múmkindikterge ıe, zamanǵa saı sport ǵımaraty ashylyp otyrǵanyna kóppen birge qýanyshtymyz. Aýdannyń tabıǵaty sulý bolǵanymen, ınfraqurylymyn jańǵyrtýda sheshimin kútken máseleler barshylyq. Sondyqtan búgingi jańa nysan sol jańa isterdiń bastamasy ǵana dep oılaımyn. Halqymyzda «Týǵan jerge qamqorlyq – ultqa qamqorlyq», degen jaqsy sóz bar. Óńir bıligi turǵyndarǵa bergen ýádesin árdaıym oryndaıdy. Osydan eki jyl buryn aýdandaǵy jas urpaq ókilderine sport keshenin salyp beremiz dep ýáde etkenbiz. Búgin sonyń nátıjesin kórip otyrmyz. Jańa sport kesheni álemge tanymal sport maıtalmandaryn tárbıelep shyǵarady degen senimdemiz, - dep atap ótti óńir basshysy.
Merdigerlik kompanııa ókilderiniń aıtýynsha, ámbebap sporttyq keshen Ertis-Baıan óńirinde alǵashqy bolyp ashylyp otyr. Qurylysyna 2,8 mlrd teńge bıýdjet qarajaty jumsalǵan.
– Mundaı áleýmettik mańyzdy jobany aýdan halqy uzaq jyl kútken edi. Óıtkeni buqaralyq sportty damytyp, halyqty salaýatty ómir saltyna baýlıtyn múmkindikter az boldy. Osy olqylyqtyń ornyn toltyratyn sport keshenine Baıanaýylǵa kire beristen jer tańdalǵany da qýantady. Sebebi bul aýmaqta sport nysandary joq. Ári aýdan basynda bir ǵana sport kesheni bar, onyń ózi kúres túrleri men boksqa ǵana arnalǵan. Jalpy sport mektebinde 600-den astam bala shuǵyldansa, endi olardyń qatary taǵy 200 balaǵa kóbeıedi dep otyrmyz. Jańadan sýda júzý, voleıbol, basketbol, shaǵyn fýtbol, sadaq atý sektsııalary jumys isteı bastaıdy. Buǵan deıin voleıbolshylarymyz shaǵyn ǵana zalda jattyǵyp júrgen. Olardyń arasynda bes jasóspirim Qazaqstannyń chempıony. Júzý sportyn damytýǵa da múmkindik ıelendik. Aýdan boıynsha búginde 9 myń adam (39 paıyz) sportpen turaqty shuǵyldanady, - deıdi Baıanaýyl aýdany dene shynyqtyrý, sport jáne týrızm bóliminiń basshysy Zeınolla Tálipov.
Qazirgi ýaqytta atalǵan aýdanda 15 sport túrinen úıirmeler bar. Endi olardyń qatary eselene túsedi dep kútilýde. Jergilikti sport mektebi sportqa beıim balalardy 6 jasynan qabyldaı beredi.
Eske sala keteıik, elimizde sport, óner jáne qosymsha bilim berýdiń biryńǵaı vaýcher júıesiniń pılottyq jobasy iske qosylady.