Baıanaýylda eki aptadan keıin týrıstik maýsym ashylady
PAVLODAR. KAZINFORM – Qazir Baıanaýyl aýdanynda jalpy syıymdylyǵy 5 myń adamǵa arnalǵan 54 demalys úıi bar.
«Jasybaı» demalys aımaǵynda týrıstik maýsymnyń resmı ashylýy 14 maýsymǵa josparlanǵan.
Aýdan basshysy Ardaq Kisentaevtyń aıtýynsha, qazir aýdanda jalpy syıymdylyǵy 5 myń adamǵa arnalǵan asatyn 54 demalys úıi bar. Jol boıynda qyzmet kórsetý nysandary jumys isteıdi. Jazǵy kezeńde «Jasybaı», «Sabyndykól» jáne «Toraıǵyr» demalys aımaqtarynda qosymsha tamaqtaný oryndary men saýda pavılondaryn ashý josparlanyp otyr.
– 14 týrıstik marshrýt ázirlenip, iske qosylýǵa daıyn. Demalýshylardyń qaýipsizdigin qamtamasyz etetin barlyq qyzmet ázirligi myǵym. Beınebaqylaý kameralary ornatylyp, sý aıdyndarynda qutqarý beketteri uıymdastyryldy, jol boıyndaǵy qyzmet kórsetý nysandary jumys isteıdi. Týrıstik ınfraqurylymdy odan ári damytý úshin shamamen 568 mln teńgege Sabyndykól kóliniń jaǵalaý aımaǵyn abattandyrý kózdelgen. Joba boıynsha kireberister, shaǵyn arhıtektýralyq formalar ornatylady jáne baqylaý alańdary uıymdastyrylady. Sondaı-aq, Baıanaýyl aýylynda 1 mlrd teńgege jýyq qarajatqa ólketaný mýzeıi ornalasatyn vızıt-ortalyqtyń qurylysy júrgizilip jatyr. Bul bastamalar «Jasybaı» kóline túsetin júktemeni azaıtýǵa baǵyttalǵan, - dep habarlady aýdan ákimdiginen.
Toraıǵyr aýylyndaǵy aınalasynda qara qandyaǵash ósetin biregeı tabıǵı oryn - «Áýlıe bulaq» aýmaǵyn abattandyrýǵa erekshe nazar aýdarylyp otyr. Onda ekologııalyq týrızmdi damytý úshin qolaıly jaǵdaı jasaldy.
Sondaı-aq kelýshiler jıi baratyn «Kempirtas» jartasyna deıingi joldy asfalttaý kózdelgen. Jartastyń janynda qola dáýiriniń arheologııalyq eskertkishteri - Andronov mádenıetiniń qorymdary men qonystary ornalasqan.
Eske sala keteıik, Baıanaýylda ulttyq park pen jergilikti ákimdik arasynda daý týdy.