Baıanaýylda boranda adasyp qalǵan azamat jarty táýlikten soń qutqaryldy

PAVLODAR. KAZINFORM - Sátbaev aýyldyq okrýginiń turǵyny mal qarap kelýge jeke kóligimen shyǵyp, adasyp omby qarǵa batyp qalǵan. Ony izdeýge tótenshe jaǵdaılar qyzmetkerleri men atqarýshy organ ókilderi jumyldyrylǵan.

Óńirlik tótenshe jaǵdaılar departamentinen habarlaǵandaı, 8 qańtar kúni saǵat 10.00-de Baıanaýyl aýdany Sátbaev aýyldyq okrýginde er adamnyń joǵalyp ketkeni týraly habarlama túsken.

«1996 jylǵy azamat mal qarap kelý úshin aýyldan shyǵyp ketken. Sońǵy ret baılanysqa saǵat 13.30-da shyqqan. Joǵalyp ketken turǵyndy izdeýge TJD kúshteri, jergilikti atqarý organdarynyń mamandary men aýyl adamdary jumyldyryldy», - dep málimdedi departamentten.

Keshe saǵat 21.37-de er adam tabyldy.

Baıanaýyl aýdandyq aýrýhanasynyń bas dárigeri Serik Arynov tabylǵan azamatty Qundykóldegi medıtsınalyq mekemeniń dárigeri qaraǵanyn jetkizdi. Ol boranda qatty tońyp qalǵan, úsik shalmaǵan. Aýdandyq aýrýhanaǵa jatýdan bas tartqan soń anasy úıine alyp ketti.