Baıanaýylda bıyl taǵy qaraqurt shyǵyp jatyr
PAVLODAR. KAZINFORM — Ulttyq parktiń málimetinshe, ýly jándikter Toraıǵyr kóliniń aýmaǵyndaǵy altynshy oramda, 30 gektardaı jerdi jaılaǵan.
Baıanaýyl ulttyq parkiniń ǵylymı qyzmetkerleri Toraıǵyr kóliniń soltústik-shyǵysyndaǵy tastaq jerlerden qaraqurt jumyrtqalaryn tapqanyn málimdedi. Demek jaz maýsymynda qaýipti jándiktiń qaıta shyǵý yqtımaldyǵy bar.
— Naýryz aıynda byltyr qaraqurt jaılaǵan jerlerdi barlap kelgenbiz. Tastar arasynda ýly órmekshilerdiń jumyrtqalary bary anyqtaldy. Jándikterdiń ózi qysta tastardyń qýysyna kirip jan saqtaıdy da, kún jylyna jer betine shyǵady. Aıryqsha qorǵalatyn jer bolǵan soń park aýmaǵynda hımııalyq óńdeýge ruqsat joq. Jumyrtqalaryn qolmen jınap, qutyǵa salyp órtep jiberemiz. Byltyr shamamen 30 gektar jerde álgindeı is-sharalardy atqarǵanbyz. Aldaǵy aptalarda bizdiń mamandar jumyrtqalardy joıýǵa taǵy kirisedi. Sondaı-aq Toraıǵyr aýyldyq okrýginiń ákimdigine eskertý hat jiberdik. Olar ózderine tıesili jerlerdi óńdeýi kerek, — deıdi ulttyq parktiń ǵylym jáne monıtorıng bóliminiń ǵylymı qyzmetkeri Murat Jasulan.
Qaraqurt osymen ulttyq parkten úshinshi jyl qatarynan tabylyp otyr. Qyzmetkerler 2023 jyly 1593 jumyrtqa men qaraqurttyń 356 urǵashysyn jınap, joısa, byltyr 523 jumyrtqa men 124 urǵashysy órtelgen.
Al Baıanaýyl aýdanynyń ákimi Ardaq Kisentaevtyń sózinshe, Toraıǵyr aýyldyq okrýgine qarasty jerlerdiń biraz bóligi (Ulttyq parkke tıesili emes jerler) qaraqurtqa qarsy hımııalyq óńdeýden ótedi.
— Bul maqsatqa bıýdjetten 1,8 mln teńge bólinip, merdiger tańdalyp qoıdy. Ótken jyly tamyz aıynda qaraqurt qaptap ketýine baılanysty tótenshe jaǵdaı rejımin jarııalaýǵa májbúr bolǵanbyz. Bıyl erte qamdandyq. Merdiger aldaǵy ýaqytta óńdeýge shyǵady. Óńdeý is-sharalaryn 2 ret júrgizip ótý qarastyrylǵan. Byltyr 150 gektar jer óńdelse, bıylǵy shama da sodan kem bolmaıdy. Byltyr óńdeýdiń nátıjeli bolǵanyn merdiger dáleldedi. Bul másele bıyl da bizdiń nazarymyzda bolady, — dedi Ardaq Kisentaev.
Park qyzmetkerleri Toraıǵyr kóliniń mańaıyna demalýǵa baratyndarǵa saq bolýdy eskertip otyr. Sebebi qaraqurt adamǵa óte qaýipti.
Dárigerler eger adamdy qaraqurt shaǵyp alsa, birden medıtsınalyq kómekke júgingen abzal deıdi. Medıtsınalyq kómek kelip jetkenshe qaraqurt shaqqan jerdi 2-3 mınýt kúıdirýge bolady. Ol jándiktiń ýly áserin joıady.
Eske sala keteıik, byltyr jazda Baıanaýyldaǵy týrıstik oryndarda qaraqurt qaptap ketti.
Al tamyz aıynda qaraqurt qaptaýyna baılanysty Baıanaýylda tabıǵı sıpattaǵy tótenshe jaǵdaı jarııalandy.
Qyrkúıek aıynda Baıanaýylda qaraqurtqa qarsy hımııalyq óńdeý sharalary qolǵa alyndy.