Baıanaýylda aǵasy men qaryndasy jynystyq zorlyqqa ushyraǵan

PAVLODAR. KAZINFORM - Maıqaıyń kentinde 13 jáne 15 jasar qyz ben er bala zorlandy. Pedofıldik áreket jasady degen kúdikpen eki er adam ustalyp, ýaqytsha qamalǵan.

Pavlodar oblysyndaǵy Maıqaıyń kentinde 13 jáne 15 jasar balany zorlady degen kúdikpen eki er adam ustalyp, qamaýǵa alyndy.

«Baıanaýyl aýdanynda kámelet jasyna tolmaǵan jasóspirimderdi zorlaý oqıǵasy tirkeldi. Maıqaıyńda turatyn biri 13, ekinshisi 15 jastaǵy eki balaǵa qatysty pedofıldik áreket jasalǵan. Jynystyq zorlyq-zombylyq jasaý deregi boıynsha eki er adam ustalyp, ýaqytsha qamaldy. Zardap shegýshilerge barlyq kómek, sonyń ishinde psıhologtar kómegi kórsetilip jatyr», -dep habarlady óńirlik balalar ombýdsmeni Sáýle Shákenova.

Oblystyq bilim berý basqarmasy da atalǵan derekti rastady.

Pavlodar oblysynyń prokýratýrasy Baıanaýyl aýdanynda balalarǵa zorlyq-zombylyq kórsetý derekteriniń artyp otyrǵanyn málimdedi.

«21 qarashada kámeletke tolmaǵandarǵa qatysty qylmystardyń ósýine baılanysty Pavlodar oblysy prokýrorynyń birinshi orynbasary Erjan Dıýsekenovtyń tóraǵalyǵymen Maıqaıyn kentinde kóshpeli jedel keńes ótkizildi. Oǵan oblys ákiminiń orynbasary, polıtsııa departamenti basshysynyń orynbasary, Baıanaýyl aýdany polıtsııa bóliminiń jeke quramy, bilim berý jáne densaýlyq saqtaý basqarmalarynyń basshylary, sondaı-aq aýdan kolledjderi men mektepteriniń dırektorlary qatysty. Kezdesý qorytyndysy boıynsha ýákiletti organdardyń jumysyndaǵy júıeli kemshilikter anyqtalyp, jekelegen qyzmetkerlerge qatysty qyzmettik tekserýler bastaldy. Krımınogendik ahýaldy jaqsartý maqsatynda polıtsııa qyzmetkerlerine, bilim berý mekemeleriniń qyzmetkerlerine naqty mindetter qoıyldy. Olardy oryndaýǵa búginnen bastap kiristi», -dep habarlady prokýratýranyń baspasóz qyzmetinen.

Eske sala keteıik, Pavlodar oblysynda kámeletke tolmaǵan qyzdardy zorlaýdyń úsh faktisi tirkeldi.