Baıanaýyl ulttyq parkine kirýdiń jańa tarıfi engizildi
PAVLODAR. KAZINFORM — Bıyl Jasybaı demalys aımaǵynda 54 demalys bazasy men 11 dámhana jumys isteıtin bolady. Demalýshylarǵa qolaıly bolýy úshin ortalyq jaǵajaıdan katamarandardy alyp tastaý josparlanǵan.
Baıanaýyldaǵy Jasybaı, Sabyndykól jáne Toraıǵyr demalys aımaqtary týrısterdi qabyldaýǵa daıyn. Ulttyq park qyzmetkerleri qazirgi ýaqytta ótkizý beketterin talapqa saı etip, arkalar men anshlagtardy, bannerlerdi jańartyp jatyr. Týrıster kóp shoǵyrlanatyn Jasybaı demalys aımaǵynda bıyl birqatar ózgeris engizilgen. Demalys aımaqtaryna ótkizetin 4 beket jumys isteıdi. Onyń ekeýi — Jasybaıda, ózgesi Sabyndykól men Toraıǵyr kólderinde.
— Jasybaı demalys aımaǵyndaǵy zańsyz dúkender men dúńgirshekterdi aldyryp tastadyq. Bıyl kól mańaıynda kıiz úı qurýǵa da ruqsat bermeı otyrmyz. Eki jerde shatyr tigýge arnalǵan arnaıy alańdar bolady. Onyń bireýi bizdiń parkke qaraıdy. Alańda oryndyqtar, káýap pisiretin oryndar, dárethanalar ornattyq. Kelýshilerge qolaıly jaǵdaılar bar. Bıyl memlekettik satyp alý boıynsha 15 dárethana aldyrttyq. Olardy tıisti jerlerge qoıyp jatyrmyz. Adamdarǵa tazalyq saqtaýdy, órttiń aldyn alýdy eskertý maqsatynda túsindirý jumystary turaqty júrgiziledi. Baǵýsyz júrgen úı janýarlaryn da anyqtap, ıelerine eskertip jatyrmyz. Budan bólek, bıyl Jasybaı kóliniń ortalyq jaǵajaıynda katamarandar men batýttardy qoıǵyzbaımyz dep sheshim qabyldadyq. Buǵan deıin jaǵajaıdyń biraz bóligin kataramandar basyp turatyn. Aldaǵy ýaqytta olar alynsa, demalýshylar úshin jaǵajaıda oryn kóbeıedi. Katamaran qyzmetin zańsyz usynyp júrgenderge qarsy kúres jarııaladyq. Qazirdiń ózinde úsh jeke tulǵany anyqtap, olar quqyq qorǵaý organdary arqyly jaýapqa tartyldy. Adamdar erkin demalýy úshin kól mańaıynda barlyq jaǵdaıdy jasaý mindetimiz dep bilemiz, - deıdi Baıanaýyl memlekettik ulttyq parkiniń dırektory Ajdar Júsipov.
Bıyl Baıanaýyldaǵy demalys aımaqtaryna keletinder úshin jańa tarıf belgilengen. Eger adam aımaqqa jaıaý kiretin bolsa 560 teńge tóleıdi. Al eger kólikpen kirse, onda bir rettik tólem kólik basyna alynady. Máselen, jeńil avtokólikter 1 575 teńge, shaǵyn avtobýstar 7 myń teńgedeı, oryn sany 32-den kóp úlken avtobýstar 19 myń teńgedeı tóleıdi.
Qazir park qyzmetkerleri jartasty jerlerdi, taý soqpaqtaryn qoqystan tazartyp, arnaıy belgiler qoıyp jatyr. «Jasyl damý» baǵdarlamasy boıynsha ınspektorlarǵa 80 myń qoqys salatyn paket, 15 konteıner bólgen. Demalýshylardy tazalyq mádenıetin saqtaýǵa shaqyrý — park qyzmetkerleriniń kúndelikti jumysynyń bir bóligine aınalmaqshy.
Ótken jyly ulttyq park aýmaǵynda 161 myńnan astam týrıst tynyqsa, olardyń 45 paıyzy Qaraǵandy oblysynan kelgen týrıster. Park basshylyǵy demalýshylar sany bıyl eselene túsetinin boljap otyr.
Buǵan deıin Baıanaýylda týrıstik maýsymnyń qashan ashylatyny týraly jazǵanbyz.
Sondaı-aq jazǵy maýsym aldynda Ulttyq park pen jergilikti ákimdik arasynda daý týǵanyn baıan etken edik.
Baıanaýylda bıyl taǵy qaraqurt shyǵyp jatyr. Mamandar kelimdi-ketimdi adamdarǵa Toraıǵyr kóli mańynda saq bolýyn eskertedi.