Baıanaýyl ulttyq parkindegi órttiń sebebi anyqtaldy

PAVLODAR. KAZINFORM - Sáýir aıynyń basynda Baıanaýyl ulttyq parkiniń jeri janǵan bolatyn. Tótenshe jaǵdaı qyzmetiniń mamandary órttiń shyǵý sebebin anyqtady. 

Ulttyq parktegi órt oqıǵasynan soń Orman sharýashylyǵy jáne janýarlar dúnıesi komıteti tekserý taǵaıyndaǵan. Onyń nátıjesinde tabıǵatqa keltirilgen shyǵyn kólemi 600 myń teńgeden asatyny málim boldy.

Órttiń shyǵý sebebi de anyqtaldy. Saýysqan ulttyq park aýmaǵyndaǵy elektr jelisine qonyp, órtengen. Odan ári jerge qulap, qurǵap turǵan qalyń shóp lap ete qalǵan.

— Qyzmettik tekserý nátıjesinde janǵan jerlerdiń aýmaǵy 20 gektar ekeni anyqtaldy. Al Óńirlik tótenshe jaǵdaılar departamentiniń mamandary tilsiz jaýdyń tutanýyna elektr kerneýine túsip órtengen qus sebepker degen qorytyndyǵa keldi, — deıdi orman sharýashylyǵy jáne janýarlar dúnıesi aýmaqtyq ınspektsııasynyń bólim basshysy Shamıl Elýbaev.

Eske sala keteıik, bıylǵy sáýir aıynda Baıanaýylda ulttyq parkke qarasty jerler órtendi. 

Órtten Jasybaı ormanshylyǵyndaǵy ǵımarattar janyp ketti. 

Dala qusynyń elektr kerneýine túsip, órtke sebepker bolýy Pavlodar oblysynda byltyr da tirkelgen.