Baıanaýyl ulttyq parkinde jıdek pen sańyraýqulaq terýge bolmaıdy

PAVLODAR. KAZINFORM – Qazirgi ýaqytta ulttyq park aýmaǵynda saıaq jáne úıirli shegirtkege qarsy hımııalyq óńdeý sharalary júrgizilip jatyr. Mamandar pestıtsıd sebilgen aýmaqtarda 30 táýlik boıy adamdardyń demalýyna, mal baǵýǵa, shóp shabýǵa jáne jemis-jıdek pen sańyraýqulaq terýge bolmaıtynyn eskertti. 

Bul týraly Baıanaýyl memlekettik ulttyq tabıǵı parkinen habarlandy.

«31 mamyr – 15 maýsym aralyǵynda adam densaýlyǵy men malǵa jáne sý kózderine óte qaýipti pestıtsıdtermen hımııalyq óńdeý júrgizilip jatyr. 300 gektar úıirli shegirtkege, 560 gektar jer saıaq shegirtkelerge qarsy óńdeledi. Ótkiziletin oryndar – Baıanaýyl, Aqsan, Toraıǵyr aýyldyq okrýgteriniń aımaǵyna shekaralas Baıanaýyl, Jasybaı bólimsheleri (Uńǵyma, Kóshet, Tikushaq turaǵy, Jambaqy, Kempirtas, Aımanbulaq, telimderinde)», - dep málimdedi ulttyq parkten.

Hımııalyq óńdeý júrgizilgen jerlerde 30 táýlik boıy adamdardyń demalýyna, mal jaıýǵa, shóp shaýyp, tasymaldaýǵa jáne jemis-jıdek, sańyraýqulaq terýge tyıym salynady.

Eske sala keteıik, bıyl saıaq shegirtkege qarsy Pavlodarda 100 myń gektar jer óńdeledi.