Baıanaýyl ulttyq parkinde órtengen jerlerdiń jalpy aýmaǵy shamamen 480 gektar
PAVLODAR. KAZINFORM — Ulttyq park basshylyǵy qazirgi ýaqytta órttiń tolyq óshirilmegenin málim etti. Tilsiz jaý jaıpap ótken jerlerdiń aldyn ala kólemi eseptelgen.
Baıanaýyl ulttyq parkine qarasty jerlerdegi órttiń oqshaýlanǵanyna 6 kúndeı ýaqyt ótkenimen, tolyq janyp bitpegen.
— Órt 14 qyrkúıek kúni Dalba orman sharýashylyǵynda tirkeldi. Alǵashqy kúnderi jel baǵytynyń ózgerýi jáne kúsheıýi saldarynan joǵary qarqynmen taraldy. Órtti oqshaýlaý jáne sóndirý jumystaryna «Qazavıaormanqorǵaý» RMQK-nyń áýeden barlaý júrgizý jáne qajetti kúshterdi jetkizý maqsatynda BO 105 tikushaǵy jáne sý tógetin qurylǵymen jabdyqtalǵan Mı-8 tikushaqtary jumyldyryldy. 16 qyrkúıek kúni oqshaýlanyp, qazirgi ýaqytta tolyq sóndirý, aýmaqty baqylaý jáne onyń qaıta tutanýyna jol bermeý jumystary jalǵasyp jatyr, — dep habarlady Kazinform tilshisine Baıanaýyl ulttyq parkiniń basshysy Almaz Jumashev.
Aldyn ala esep boıynsha shamamen 480 gektar jer janyp ketken. Jalpy órtti sóndirý jumystaryna 135 adam jáne 41 tehnıka jumyldyrylǵan.
— Tabıǵı apattyń tolyq joıylmaı otyrýynyń negizgi sebebi jalyn aǵashtardyń tamyryna enip ketken. Keıde orman órti kezinde ot jerdiń betinde ǵana emes, astynda da júredi. Qalyń shymtezek (torf) nemese qurǵaq organıkalyq qaldyqtar janǵanda, órt aǵash tamyrlaryna ótedi. Mundaı órt syrt kózge kórinbeı, aptalap, tipti aılap ishteı janýy yqtımal, — deıdi park basshysy.
Eske sala keteıik, 14 qyrkúıek kúni Qaraǵandy óńirinen kelgen qalyń órt Baıanaýyl ulttyq parkiniń aýmaǵyna ótip ketti.
Al 16 qyrkúıekte Baıanaýyl ulttyq parkindegi orman órti oqshaýlandy.
