Baıanaýyl ulttyq parkinde orman órti shyqty
ASTANA. KAZINFORM — Pavlodar oblysyndaǵy «Baıanaýyl» memlekettik ulttyq tabıǵı parkiniń aýmaǵynda orman órti tirkeldi.
Aldyn ala málimet boıynsha, órt 9 shilde kúni saǵat 11:50–de Jasybaı ormanshylyǵy aýmaǵynda shyqqan. Órt týraly habarlama túskennen keıin saǵat 12:19–da sóndirý jumystary bastaldy. Oqıǵa ornyna alǵash bolyp «Qazavıaormanqorǵaý» áýe órt sóndirý qyzmetiniń eki desantshysy jetken.
— Qazirgi ýaqytta tilsiz jaýmen kúreske ulttyq parktiń memlekettik orman kúzetiniń 22 qyzmetkeri, eki órt sóndirý kóligi, úsh shaǵyn orman órtin sóndirý kesheni, Tótenshe jaǵdaılar mınıstrligi men jergilikti atqarýshy organdardyń kúshteri jumyldyrylǵan. Sondaı-aq «Qazavıaormanqorǵaý» kásipornynyń tikushaǵy men alty áýe órt sóndirý desantshysy jumys istep jatyr, — delingen habarlamada.
Órttiń taýly, jartasty ári tehnıka jetýi qıyn aýmaqta shyǵýyna baılanysty Semeı qalasynan І klasty tikushaq qosymsha jiberildi. Sonymen qatar QR Tótenshe jaǵdaılar mınıstrliginiń taǵy bir tikushaǵy ushýǵa daıyndalyp jatyr.
Jaýapty mekemelerdiń málimetinshe, qazirgi ýaqytta jaǵdaı tolyq baqylaýda.
Eske salaıyq, keshe, 2026 jylǵy 8 shildede elimizde 10 orman órti tirkelgenin habarlaǵanbyz.
