Baıanaýyl ulttyq parkinde bulandar fototuzaqqa tústi
ASTANA. KAZINFORM – Baıanaýyl memlekettik ulttyq tabıǵı parkiniń ormandarynda ornatylǵan fototuzaqtar bulandardy tirkedi.
Fototuzaqtar Baıanaýyl memlekettik ulttyq tabıǵı parki men Toraıǵyrov ýnıversıtetiniń doktorant qyzmetkerleriniń birlesken jumysy aıasynda ornatylǵan.
Bulan – ormandy mekendeıtin eń iri tuıaqty janýarlardyń biri. Dene turqy iri bolǵanymen, ol qalyń orman arasynda erkin qozǵalyp, adam kózine kóp túse bermeıdi. Sondyqtan fototuzaqqa túsken mundaı kadrlar janýarlardyń tabıǵı ortadaǵy tirshiligin zertteý úshin mańyzdy.
– Fototuzaqtar arqyly mamandar janýarlardyń qaı aýmaqtardy mekendeıtinin, olardyń qozǵalysy men tabıǵı ortadaǵy minez-qulqyn adam aralasýynsyz baqylaı alady, – delingen aqparatta.
Mundaı baqylaý tásili jabaıy janýarlardyń tirshilik etý ortasyn zertteýge jáne olardyń tabıǵı jaǵdaıdaǵy qozǵalysy týraly málimet jınaýǵa múmkindik beredi.
Bul joly fototuzaqtar Baıanaýyl ormandarynda erkin júrgen bulandardy túsirip alǵan.
Aıta keteıik, «Altyn-Emel» ulttyq parkinde taýeshkiler toby fototuzaqqa tústi.
