Baıanaýyl ulttyq parkinde bulan kóbeıe túsken
Baıanaýyl memlekettik ulttyq tabıǵı parkinde bulan sany 80-ge jýyqtap qaldy, dep habarlaıdy Kazinform.
Ulttyq park aýmaǵynda qamysty, qoǵaly jerlerdiń kóp bolýy tuıaqty janýardyń aýmaqta turaqtap qalýyna sebep bolyp otyr.
Bulan negizi buǵy tektes sútqorekti janýar bolǵanymen, turqy jaǵynan túıege jaqyn, tuıaǵy aıyr keledi. Qazaqstandy mekendeıtin sútqorektilerdiń ishindegi eń irisi. Analyǵy kóp jerlerde qandaǵaı dep atalady. Qandaǵaıdyń eń irileriniń bıiktigi 2,4 metrge, tumsyǵynan quıryǵyna deıingi turqy 3 metrge, salmaǵy 620 kılogramǵa deıin jetedi.
Resmı derekterge súıensek, qazirgi kúni Qazaqstanda 7 myńǵa jýyq bulan bar. Sany keıingi jyldary úsh esege ósip, Arqa jerindegi ný ormandy, taýly aımaqtarda kóbeıe bastaǵany baıqalady deıdi tabıǵat qorǵaý ınspektorlary. Halyqaralyq Qyzyl kitapqa engenimen, jer betindegi naqty sany belgisiz.
- 1985 jyldan beri Baıanaýyl ulttyq tabıǵı parki aýmaǵynda jıi baıqalyp otyr. Kezinde Reseıdiń qalyń ormandarynda, Altaı taýlarynda bolǵan órtten aýyp, Qazaqstandy mekendeı bastaǵan janýar kóbine Baıanaýyl, Qarqaraly taýlarynan óris tapqan. Bul janýardyń bir ereksheligi, aǵzasynda jylqy sekildi ót bolmaıdy. Aşylaýyt, qamysty, qoǵaly jerlerge jaıylǵandy, terektiń qabyǵymen, taýdaǵy arshamen qorektengendi unatady. Bizdiń Baıanaýyl aýmaǵynda topyraǵy sortań, aşy jerler kóp. Solardy jıi jaǵalaıtyny baıqalady. Ereksheligi, úıirdi asa unatpaıdy, ekeýden, úsheý-tórteýden júre beredi. Atalyǵynyń aspanǵa qaraı taramdalyp turatyn jýan ári jalpaq múıizi bar. Syrttaı qaraǵanda jýas kóringenimen, kúzgi kúıekke túsetin mezgilde olarǵa jaqyndaý qaýipti. Ondaı ýaqytta adamǵa shabýyldaǵan oqıǵalardy jıi estımiz. Janýardyń kúshtiligi sonsha, qasqyrǵa aldyrmaıdy. Taıynshadaı arlandy múıizimen ilip, jaryp ketedi. Baıanaýyldyń Kúrkeli, Jaıaý Musa, Qarajar aýyldary mańyndaǵy bıik taýlarda, Jalańtós asýy men Myrzashoqyda, Qońyr áýlıe úńgiri mańynda jıi ushyrasady, - deıdi Baıanaýyl ulttyq tabıǵı parkiniń ınspektory, belgili ólketanýshy Altynbek Qurmanov.
Pavlodar oblystyq orman sharýashylyǵy jáne janýarlar dúnıesi aýmaqtyq ınspektsııasynyń málimetinshe, qazirgi kúni Baıanaýylmen qosa, bulandar Sharbaqty aýdanyndaǵy jalqaraǵaı ormandarynda da bar. Bul aýmaqta shamamen 170 bulan sanaldy.