Baıanaýyl ulttyq parkinde alǵashqy qar jaýdy
PAVLODAR. KAZINFORM — Jelide Baıanaýyldyń aq ulpaǵa malynǵan ásem taýlary túsirilgen vıdeo paıda boldy. Týrıster ulttyq parktegi qysqy týrızmniń ashylýyn asyǵa kútýde.
Baıanaýyl ulttyq parkiniń aýmaǵynda bıylǵy alǵashqy qar tústi. Ulpa qarǵa kómilgen asqar taýlar men qaraǵaı ormandarynyń kórinisinen bólek, kadrda sońǵy ýaqytta bul aýmaqty turaqty mekenine aınaldyrǵan bulan da baıqalyp qaldy.
Vıdeony jergilikti tabıǵat janashyry Esen Júsipbaev túsirgen.
Aıtyp ótelik, ulttyq park 1985 jyly 12 tamyzda Pavlodar oblysy Baıanaýyl aýdanynda qurylǵan. Birneshe ormanshylyqtan turady. Ózge erekshe qorǵalatyn tabıǵı aýmaqtarǵa qaraǵanda munda tabıǵı eskertkishter jıi kezdesedi. Park aýmaǵynda 24 arheologııalyq tabıǵı eskertkish ornalasqan — Kempirtas, Qońyr áýlıe úńgiri, Dravert úńgiri, tastaǵy kóne jazýlar, Saımantas, Kógershintas, Atbasy tasy, Naızatas jartasy jáne t. b. Budan bólek, tarıhı oryndar da molynan shoǵyrlanǵan.
Aýmaqta negizinen tórt sý aıdyny — Toraıǵyr, Birjankól, Sabyndykól jáne Jasybaı kóli ornalasqan. Bul kólderdiń barlyǵynyń sýy tuşy. Sonyń ishinde Jasybaı kóliniń aınalasy demalys aımaǵyna aınalǵan.
Jasybaı, Sabyndykól jáne Toraıǵyr demalys aımaqtarynda jeltoqsannan bastap qysty týrızm ashylady. Mundaǵy eń tanymal týrıstik baǵyt — Myrzashoqy taý-shańǵy kesheni. Bul uzyndyǵy 960 metrlik arqan joly bar demalys nysany. Ásirese ekstremaldy sport túrin unatatyndar úshin qyzyqty.
Byltyr qysta Baıanaýylda muz ústinde syrǵanaǵan aqqýlar men jelmen jarysqan kıikter beınejazbaǵa túsip qalǵan edi.
Al Toraıǵyr kóli ashyq aspan astyndaǵy muz aıdynyna aınalyp keledi.
