Baıanaýyl ulttyq parki aýmaǵyndaǵy kólderde aeratsııa júrgizilip jatyr
PAVLODAR. KAZINFORM - Ulttyq parktiń aýmaǵynda Sabyndykól, Jasybaı, Birjankól, Toraıǵyr kólderi bar. Sý aıdyndarynda balyqtyń 13 túri men shaıan tárizdi jándikterdiń 9 túri tirkelgen.
Baıanaýyl ulttyq tabıǵı parkiniń memlekettik ınspektorlary men mekemedegi ǵylym jáne monıtorıng bóliminiń mamandary sý aıdyndaryndaǵy balyqtardy ottegimen qamtamasyz etý jumystaryn belsendi júrgizip jatyr. Qyzmetkerler parkke qarasty Sabyndykól, Jasybaı, Birjankól, Toraıǵyr kólderiniń muzyn burǵylap, oıyqqa qamys tastalýda.
Mamandardyń aıtýynsha, búginde kólderdegi muzdyń qalyńdyǵy keı jerlerde 42 sm-den 65 sm-ge deıin jetedi. Sý betine muz qalyń qatqan saıyn sý astyn mekendeıtin janýarlardyń tynys alýyna úlken kedergi keltiredi.
- Aeratsııa degenimiz, ózen-kólderdi aýamen qanyqtyrý protsesi. Organıkalyq zattardyń totyǵýy barbotırleý arqyly ótkiziledi. ıAǵnı oıyqtardy qolmen burǵylap, olardy qamyspen toltyramyz. Qamys ottegini jaqsy ótkizedi. Park aýmaǵyndaǵy 4 kólde balyqtyń 13 túri men shaıan tárizdilerdiń 9 túri kezdesedi. Tuqy, sary móńke, torta, qarabalyq, alabuǵa, shortan balyqtary keń taralǵan. Qys mezgilinde muz astyndaǵy balyqtarǵa qajetti otteginiń jetkizilýi óte mańyzdy,-deıdi ǵylym jáne monıtorıng bóliminiń basshysy Dınara Kúnshýaqova.
Ulttyq park aýmaǵyndaǵy sý aıdyndary áýesqoı balyqshylardyń qyzyǵýshylyǵyna ıe. Qysqy demalys kúnderinde munda balyqshylar jıi kelip, qarmaq salady.
