Baıanaýyl ulttyq parki aýmaǵynda aǵyndy sýlardy tazartý jobasyn iske qosý qajet — Májilis depýtaty
ASTANA. KAZINFORM — Baıanaýyl ulttyq parki aýmaǵynda aǵyndy sýlardy tazartý jobasyn iske qosý qajet. Búgin Májilistiń jalpy otyrysynda Premer-mınıstrdiń orynbasary Qanat Bozymbaevqa saýal joldaǵan depýtat Nurjan Áshimbetov osyndaı usynys bildirdi.
— Aǵyndy sýlardy tazartý jáne qaıta paıdalaný barlyq elde keńinen qoldanylady. Alaıda, búgingi kúni Qazaqstanda mundaı tehnologııalardy qoldanýdyń tıisti damýy joq. Qabyldanǵan Sý kodeksinde ónerkásiptik kásiporyndar sýdy qaıta paıdalanýdy qoldanýǵa mindetti normalar qabyldandy. Sondaı aq 2027 jyldan bastap barlyq sýbektiler úshin qaıta sý paıdalanýdy qoldaný josparynsyz sý paıdalaný ruqsattamasy berilmeıtini zańnamalyq turǵydan qarastyrylǵan, — dedi ol.
Osy rette depýtaty aǵyndy sýlardy tazartý pılottyq jobasyn Pavlodar oblysyndaǵy Baıanaýyl ulttyq tabıǵı parki Jasybaı kóliniń demalys aımaǵynda iske asyrýdy usyndy.
— Búginde 100-den astam týrızm sýbektileri aǵyndy sýlardy aǵyzý qudyqtaryna jınaıdy. Sodan keıin olar qaýipti taý betkeıleri arqyly aýdan ortalyǵynan 30 shaqyrymnan astam tys ornalasqan polıgon aýmaǵyna shyǵarylady. Ondaǵan mamandandyrylǵan kólikterdiń qozǵalysy jol qaýipsizdigine áser etedi. Al bıznes úshin kólik shyǵyndary jyl saıyn ósedi. Bul saıyp kelgende demalýshylardyń qaltasyna áser etedi, — dedi depýtat.
Nurjan Áshimbetovtiń aıtýynsha, qyzmetterdiń qymbattaýyna baılanysty kásipkerler aǵyndy sýlardy septıkterden basqa nysandarǵa tógýge nemese sýdy paıdalanýdy azaıtýǵa umtylady. Bul ekologııalyq júktemege jáne týrısterge qyzmet kórsetý sapasynyń nasharlaýyna ákeledi.
— Jobany iske asyrý jaǵdaıynda tazartylǵan sýlardy óndiristik jáne sharýashylyq qajettilikter, onyń ishinde ásirese jazǵy kezeńde qajet bolatyn jasyl jelekterdi sýarý úshin paıdalanýǵa bolady, — dedi ol.
Osyǵan oraı Májilis depýtaty vıtse-premerge mynadaı usynystar berdi:
— tıisti mınıstrlikter men ákimdikterge sýdy qaıta paıdalaný tehnologııalaryn eskere otyryp, sýdy únemdeý sharalary boıynsha jol kartalaryn daıyndaýdy tapsyrý;
— Pavlodar oblystyq ákimdigine Ekologııa jáne tabıǵı resýrstar mınıstrligimen birlese otyryp, 2026 jyly «Jasybaı kóli» týrıstik aımaǵyndaǵy Baıanaýyl ulttyq parkiniń aýmaǵynda aǵyndy sýlardy tazartý pılottyq jobasyn júzege asyrýdy júkteý.
Buǵan deıin Baıanaýyl týrıstik kompanııalardan túsetin salyqtyń eleýli bóligin joǵaltyp otyrǵanyn jazǵan edik.