Baıanaýyl týrıstik kompanııalardan túsetin salyqtyń eleýli bóligin joǵaltyp otyr

PAVLODAR. KAZINFORM — Máselen ótken jazda týrızm salasynan aýdan bıýdjetine nebári 30 mln teńge kiris kirgen. Buǵan týrıstik aımaqta qyzmet kórsetetin sýbektilerdiń ózge óńirlerde tirkelýi sebep bolyp otyr.

Baıanaýyl aýdanynyń ákimi Ardaq Kisentaevtyń aıtýynsha Jasybaı, Toraıǵyr, Sabyndykól aımaqtarynda týrızm qanat jaıyp keledi. Jyl saıyn munda keletin demalýshylar sany da ulǵaıa túsken. Alaıda óńir bul ıgilikti shyn máninde sezine almaı otyr, salyq arqyly túsetin tólemder mardymsyz.

— Bizdiń aýdanda aýyl sharýashylyǵy men ónerkásip jolǵa qoıylǵan. Bular negizinen Maıkóbe, Sarykól, Taldykól, Keregetas, Maıqaıyńaltyn kenishteri. Al týrıstik saladan byltyr 30 mln teńgedeı ǵana salyq tústi. Munda 60-tan astam jeke sýbektiler qyzmet kórsetse, solardyń 19-y ǵana aýdanymyzda tirkelgen. Ózgesi Almatyda, elimizdiń basqa qalalarynda tirkelip tur. Soǵan oraı olardyń salyq organdary arqyly baqylaý múmkin emes, — deıdi ol.

Sońǵy jyldary aýdan bıligi 6 kásipkermen sóılesip, olardy jergilikti jerde tirkelýge kóndirgen. Alaıda olar jazda ǵana jumys istep, keıin kelgen jaqtaryna taıyp turǵan.

Buǵan deıin Baıanaýylda qysqy týrızm ashylǵany týraly jazǵanbyz.