Baıanaýyl tas jolynda kólik apatynan júrgizýshi qaza tapty
PAVLODAR. KAZINFORM - Aldyn ala málimet boıynsha jeńil kóliktiń júrgizýshisi rýlge ıe bola almaı joldan shyǵyp ketken. Polıtsııa qaıǵyly oqıǵa boıynsha qylmystyq is qozǵady.
Oblys ortalyǵynan Baıanaýylǵa aparatyn respýblıkalyq tas jolda kólik apatynan júrgizýshi kóz jumdy.
- 16 qazan kúni Baıanaýyl aýdany Birlik aýylynan 10 shaqyrym jerde, «Qalqaman-Kerneı» avtojolynda Lexus RX 330 markaly avtokóliktiń júrgizýshisi rýlge ıe bola almaı, jol jıegine shyǵyp aýdarylǵan. Oqıǵa saldarynan júrgizýshi qaza tapty, - dep habarlady óńirlik Polıtsııa departamentiniń baspasóz qyzmetinen.
Polıtsııa kólik apaty boıynsha qylmystyq is qozǵady. Oqıǵanyń mán-jaıy men sebebi tergeý barysynda anyqtalady.
Tártip saqshylary mundaı qaıǵyly jaıttardyń aldyn alý úshin jol qozǵalysy erejesin, jyldamdyq rejımin qatań saqtaýdy aýa raıy jaǵdaıyn eskerýdi jáne kólik quralynyń tehnıkalyq jaı-kúıin baqylap otyrýdy eskertedi.
Eske sala keteıik, Pavlodar oblysynda júk kóligi men jeńil kólik soqtyǵysyp, eki adam mert boldy.