Baıanaýyl ormandarynda silesi qatyp sharshaǵan bulan taspaǵa túsip qaldy
PAVLODAR. KAZINFORM - Janýarlardyń qazirgi ýaqytta kúıekke túsetin mezgili. Vıdeodaǵy bulan kezekti shaıqastan jaralanyp, ábden sharshaǵan bolýy yqtımal dep boljaıdy mamandar.
Baıanaýyl ormandarynda aıaǵyn áreń basyp bara jatqan bulannyń atalyǵy vıdeoǵa tústi.
Vıdeo avtory ony shamasy shaıqastan jaraqat alyp qalǵan bolýy múmkin dep jazǵan.
Baıanaýyl ulttyq parki mamandarynyń aıtýynsha, bulandardyń atalyqtary kóbine aýmaq úshin talasady. Olar jalǵyz júrip, kúıek kezinde shaǵylysatyn urǵashy bulandardy izdeıdi. Sondaı sátte atalyqtary bir-birimen kezigip qalsa, shaıqasqa shyǵady. Ótkir tuıaqtarymen, múıizderimen birin-biri jaralaıdy.
- Bular úıir ustamaıtyn, eki-úsheýden júretin janýarlar. Shaǵylysý mezgilinde ózderin óte agressıvti túrde ustaıdy. Atalyqtary kóbine jalǵyz júredi. Adamdar bul ýaqytta janýarlarmen bet-bet kezdesip qalýdan saq bolýy kerek, - deıdi ańshylyqtanýshy Bekzat Ákimbekov.
Eske sala keteıik, Baıanaýyl ulttyq parkinde bulandar fototuzaqqa tústi.
