Baıanaýyl ormandarynda bulan kózge tústi
PAVLODAR. KAZINFORM — Baıanaýyldyń taý baýraılarynda bulan kózge tústi. Ulttyq park aýmaǵynda búginde 80-nen astam bulan bar dep esepteledi.
Resmı derekterge súıensek, qazirgi kúni Qazaqstanda 7 myńǵa jýyq bulan bar. Sany keıingi jyldary úsh esege ósip, Arqa jerindegi ný ormandy, taýly aımaqtarda kóbeıe bastaǵany baıqalady deıdi tabıǵat qorǵaý ınspektorlary. Halyqaralyq Qyzyl kitapqa engenimen, jer betindegi naqty sany belgisiz.
Baıanaýyl taýlarynyń arasyndaǵy orman-toǵaılardy bulandar qysy-jazy meken etedi. Tuıaqty janýarlar aýmaqta 1985 jyldan beri jıi baıqalyp otyr. Bul janýardyń bir ereksheligi, aǵzasynda jylqy sekildi ót bolmaıdy. Aşylaýyt, qamysty, qoǵaly jerlerge jaıylǵandy, terektiń qabyǵymen, taýdaǵy arshamen qorektengendi unatady. Baıanaýyldyń Kúrkeli, Jaıaý Musa, Qarajar aýyldary mańyndaǵy bıik taýlarda, Jalańtós asýy men Myrzashoqyda, Qońyr áýlıe úńgiri mańynda jıi ushyrasady.
Pavlodar oblysynda bulan Baıanaýylmen qosa, Ertis ormany rezervatynda kezdesedi. Ormanshylar sońǵy ret 170-ten astam janýardy sanap shyqqan.
Eske sala keteıik, Ertis ormanynda buzaýymen sýatqa kelgen bulan fototuzaqqa túsip qaldy.