Baıanaýyl ormandarynda alǵash ret quný kózge tústi
PAVLODAR. KAZINFORM - Baıanaýyl memlekettik ulttyq tabıǵı parkinde erekshe ǵylymı jańalyq tirkeldi. Fotomonıtorıng barysynda Ertis-Baıan óńirindegi janýarlar dúnıesine tán emes sırek jyrtqysh – quný (Gulo gulo) fototuzaqqa túsken.
Ǵylymı derekterge súıensek, Qazaqstanda qunýdyń negizgi taralý aımaǵy Ońtústik Altaıdyń taýly-taıgaly óńirlerin qamtıdy. Degenmen bul jyrtqyshtyń negizgi mekeninen alys aýmaqtarda kezdesken tarıhı derekteri de bar. Atap aıtqanda:
-1932 jyly – Býrabaı ormandarynda (qazirgi Aqmola oblysy);
- 1948–1949 jyldary – Shaǵalaly kóli mańynda (qazirgi Soltústik Qazaqstan oblysy).
Baıanaýyl ulttyq parkinen habarlaǵandaı, bul – Pavlodar oblysynda qunýdyń alǵash ret tirkelýi.
Ǵalymdar mundaı jaǵdaılardy jekelegen janýarlardyń alys qashyqtyqqa oryn aýystyrýymen baılanystyrady.
Eske sala keteıik, Baıanaýylda áýeden barlaý kezinde arqarlar beınekameraǵa túsip qaldy.
