Baıan Jalynqyzy: Chempıondyqqa qol jetkizý ońaı bolǵan joq

ıABÝLI.KAZINFORM – Shańǵy sportynan Qytaı quramasynyń sportshysy, ІH qysqy Azııa oıyndarynyń chempıony, Qytaıda týyp-ósken qandasymyz Baıan Jalynqyzy Kazinform tilshisine eksklıýzıvti suhbat berdi.

Баян Жалынқызы: Чемпиондыққа қол жеткізу оңай болған жоқ
Фото: Кейіпкердің әлеуметтік желідегі парақшасынан

Sportshy altyn medal jeńip alǵannan keıingi oıymen bólisip, chempıondyqtyń ońaılyqpen kelmegenin aıtty. 

– Azııa oıyndaryna alǵash ret qatysyp otyrmyn. Altyn medal jeńip alǵan kezimde óte qýanyshty sezimde boldym. Shyny kerek, bul jeńiske qol jetkizý ońaıǵa soqpady. Ekinshi aınalmada joǵary shyqqanda sharshaǵanymdy sezindim. Alaıda ishteı jeńiske jetýim kerek ekenin oılap, márege alǵashqy bolyp jetýge bar kúshimdi saldym, - deıdi Baıan.

Sportshy ózin qoldap jatqan qazaqstandyq jankúıerlerge rahmet aıtty. 

– Meni qoldap-qolpashtap jatqandaryńyzdy estip jtyrmyn. Barlyqtaryńyzǵa rahmet aıtamyn. Sizderdiń qoldaýlaryńyzben bıikterden kórinýge tyrysamyn, - dedi ol.

Sońynda, sportshy óz bapkerlerine alǵys bildirip, Olımpıada oıyndaryna qatysýdy maqsat etip otyrǵanyn aıtty.

– Osyndaı jeńiske qol jetkizýime bapkerlerim men komandalastarym úlken úles qosty dep oılaımyn. Endigi kezekte Olımpıada oıyndaryna joldama alyp, sol jerde jarys jolyna shyǵýdy armandaımyn, - deıdi qandasymyz.

Aıta keteıik, qazaq qyzy Harbın qysqy Azııa oıyndarynda shańǵy jarysynan áıelder arasynda 5 shaqyrymǵa syrǵanaýdan (erkin stıl) 12 mınýt 07.5 sekýnd nátıje kórsetip, máre syzyǵyn birinshi bolyp kesti.

Baıan Jalynqyzy 1999 jyly QHR Altaı aımaǵy Jemeneı aýdanynda dúnıege kelgen. Ol Shańǵy sporty túrleri boıynsha Qytaı ulttyq quramasyna qabyldanyp, Beıjiń qysqy Olımpıadasynda óner kórsetti.

Buǵan deıin habarlaǵanymyzdaı, Qytaı quramasynyń sapynda ulty qazaq 4 sportshy IX qysqy Azııa oıyndaryna qatysyp jatyr. Olar: Aqnar Adaqqyzy (konkımen júgirý), Qanaǵat Muhameduly (konkımen júgirý), Baıan Jalynqyzy (Shańǵy) jáne Samǵar Serikuly (Shańǵy).

Сейчас читают