Baıan-Ólgııdegi qazaqtar Naýryz merekesine oraı «Mádenıetti otbasy» baıqaýyn jarııalady
ASTANA. QazAqparat - Mońǵolııanyń Baıan-Ólgıı qalasynda turatyn qandastarymyz Naýryz merekesin erekshe qarsy alýdy josparlap otyr.
Jyl saıyn joǵary deńgeıde atap ótetin ulttyq merekeni baıólkelik aǵaıyndar tek oıyn-saýyqpen ǵana emes, qala turǵyndarynyń salaýatty ómir saltyn ustanýymen de baılanystyrýda. Baıólke qazaq radıosynyń habarlaýynsha, Ólgeı qalalyq ákimdigi «Mádenıetti otbasyn» anyqtaýǵa arnalǵan baıqaýdy jarııalady, dep habarlady Baq.kz.
Saıttyń jazýynsha, Naýryz merekesi ejelden tazalyq pen qaıyrymdylyq kórinis tabatyn, tyń tirshilik bastalatyn kún retinde erekshelenip keledi. Jer býsanyp, bar tirshilik jandana bastaıtyn mezgildi Jańa jyl retinde qabyldap kelgen halqymyz 22 naýryzda aradaǵy arazdyqty umytyp, bir-birin kóktemniń shýaqty kúnindeı meıirimdi bolýǵa shaqyrady. Qaharly qysty uzatyp salyp, baladan babaǵa deıin kóshege shyǵyp aǵash otyrǵyzady. Bulaq arshyp, joldardy tazalaıdy. Ulttyq merekeniń osyndaı qyrlaryn da ashyp, halyqty salaýatty ómir súrýge shaqyrýdy maqsat etken Ólgeıdegi otbasylar baıqaýy ár januıanyń tirshilik etip, qyzmet jasaýǵa jáne oqyp bilim alýǵa múmkindikteri bar-joǵyn, turmystyq buıymdarynyń rettiligi men gıgıenalyq talaptarǵa saı bolýyn, sondaı-aq úı aýlasyn jasyldandyryp, bólmelerge gúlder ósirý jaǵyn da synǵa salmaq.
Aqpannyń 18-i men Naýryzdyń 18-i arasynda ótetin baıqaý 22 naýryz kúni jeńimpazdardy jarııalaıtyn bolady.
