Baıan Ólgıı aımaǵynyń qazaǵy Sultan Táýkeıuly Mońǵolııanyń halyq jazýshysy atandy
Respýblıka qurylǵanyna 98 jyl, Uly ımperator Shyńǵys hannyń týǵanyna 860 jyl tolýyna oraı Mońǵolııa Prezıdenti Ýhnaagıın Húrelsúh jarlyq shyǵaryp birqatar azamattarǵa memlekettik joǵarǵy ataq, orden, medalder tabystaldy.
Osy oraıda Mońǵolııa mádenıetine eńbek sińirgen qaıratker Sultan Táýkeıulyna «Halyq jazýshysy» ataǵy berildi.
Ol «Mońǵoldyń qupııa shejiresi», «Ejelgi Mońǵol patshalarynyń ulttyq entsıklopedııasy» sııaqty tarıhı derekkózder, «Mońǵol halyq maqal-mátelderi», «Mońǵolııa Konstıtýtsııasy» qatarly týyndylardy qazaq tiline aýdaryp, qazaq oqyrmandaryna usynǵan.
Sonymen qatar, «Quran karım», «Islam týraly negizgi málimetter», Abaı Qunanbaevtyń «Qara sózderi» qatarly týyndylardy mońǵol tiline aýdaryp, halyq aǵartý isine zor úles qosqan.
Sultan Táýkeıuly 1944 jyly 17 qarashada Monǵolııanyń Baıan-Ólgıı aımaǵynda týǵan.
1966 jyly Mońǵolııa ýnıversıtetin bitirgen. Ekonomıka ǵylymynyń kandıdaty. Memleket, qoǵam qaıratkeri. Mońǵolııa Halyq Respýblıkasynda Saýda mınıstrligi departamentiniń bastyǵy, aýdandyq, qalalyq, aımaqtyq partııa komıtetteriniń ekinshi jáne birinshi hatshysy bolǵan.
Mońǵolııa Respýblıkasynyń Parlament múshesi bolyp saılanǵan. Monǵolııanyń Vengrııa, Avstrııa elderindegi tótenshe jáne ókiletti elshisi qyzmetin atqarǵan.
Sultan Táýkeıuly memlekettik jaýapty qyzmetterde júrip, 1964 jyldan bastap ádebıetpen shuǵyldanyp, proza, drama, aýdarma janrlarynda jemisti eńbek etip keledi. Onnan asa kitaptyń avtory.
Shyǵarmalaryn eki tilde – qazaq jáne monǵol tilderinde jazady.
Foto: kaznews.mn
