Baıan-Ólgeıde soqqan daýyl birneshe mektepti shatyrsyz, bir aýyldy jaryqsyz qaldyrdy
BAıAN-ÓLGEI. QazAqparat - Mońǵolııanyń Baıan-Ólgeı aımaǵynda jeldiń jyldamdyǵy 24-28 m/s jetip, qatty daýyl turdy. Saldarynan Ulanqus sumynynyń (aýyly) orta mektebi men balabaqsha ǵımarattarynyń shatyry ushyp, Delún aýyly jaryqsyz qaldy, dep habarlaıdy «QazAqparat» HAA tilshisi.
Daýyl keshe, 26 naýryz kúni bolǵan. Aımaqtyq elektr jelisi basqarmasy tarapynan tıisti sharalar qolǵa alynýda. Mamandar elektr jelisin qalpyna keltirý úshin birneshe kún qajettigin aıtýda.
Al Ulanqus aýyly ákimi Nurlan Ońashybaıulynyń málimetinshe, atalmysh aýyldyń talshyqty-optıkalyq kabeli úzilip, Soǵaq orta mektebiniń kókónis jylyjaıy jelge ushqan. Sondaı-aq shańdy daýyldyń saldarynan, jergilikti áýejaıǵa ushaqtar qona almady.
Daýyl kúni ǵımarattardyń shatyry jelge ushyp, keıbir úılerdiń qorshaýy qulaǵan. Mysaly Ólgeı kentinde - 10, Ulanqus, Tulba aýyldarynda - 2, Saqsaıda - 7, Buıynty aýylynda - 5, Bulǵyn aýylynda 1 úıdiń qorshaýy qulap, shatyry búlingen.
Búgingi tańda aımaqtyq Tótenshe jaǵdaılar jónindegi komıteti, kelgen shyǵyn kólemin anyqtap jatyr. Al aımaqtyq sý, meteorologııalyq jáne ekologııalyq qadaǵalaý basqarmasynyń boljaýynsha, 27 naýryzdan 2 sáýirge deıingi aralyqta 12-14 m/s jyldamdyqpen soqqan jeldiń ekpini 20-22 m/s jetip, sońy kúshti daýylǵa ulasýy múmkin. 
Avtor: Qýat Ýathan
