Baıan-Ólgeıde Qazaqstan konsýldyǵy ashylady

ASTANA. KAZINFORM — Mońǵolııanyń Baıan-Ólgeı aımaǵynda Qazaqstan konsýldyǵy ashylady. Bul týraly Aqordada Mońǵolııa Prezıdenti Ýhnaagıın Hýrelsúhpen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty. 

— Biz ekijaqty qarym-qatynastyń barlyq baǵyty boıynsha mazmundy ári nátıjeli kelissózder júrgizdik. Saıası-ekonomıkalyq, mádenı-gýmanıtarlyq jáne ózge de saladaǵy yqpaldastyǵymyzdy odan ary arttyrýǵa kelistik. Atap aıtqanda, biz Mońǵolııanyń Baıan-Ólgeı aımaǵynda Qazaqstannyń konsýldyq mekemesin ashý týraly ózara kelisimge keldik, — dedi Prezıdent.

Memleket basshysynyń paıymynsha, muny shyn máninde baýyrlas ári tarıhy tamyrlas elderimizdiń arasyndaǵy strategııalyq seriktestik rýhyna saı keletin mańyzdy qadam dep aıtýǵa tolyq negiz bar.

— Sondaı-aq bul mońǵol eliniń qazaq halqyna degen izgi nıeti men shynaıy dostyq kóńiliniń aıqyn kórinisi ekeni sózsiz. Biz bul sheshimdi joǵary baǵalaımyz. Osy oraıda Prezıdent Hýrelsúh myrzaǵa zor alǵysymdy aıtqym keledi, — dedi Qasym-Jomart Toqaev.

Buǵan deıin Qasym-Jomart Toqaev Aqordada Mońǵolııa Prezıdentin qarsy alǵanyn jazǵan edik.