Baıan-Ólgeıde qazaq batyryna eskertkish qoıyldy

ÓLGEI. QazAqparat - Qazaq-jońǵar soǵystary men qazaq-qytaı qatynasy kezinde erligimen jáne dıplomatııalyq qabiletimen kózge túsken Qojabergen batyr Jánibekulyna Mońǵolııanyń Baıan-Ólgeı  aımaǵynyń ortalyǵynda eskertkish qoıyldy, dep habarlaıdy QazAqparat. Bul týraly Halyqaralyq Túrki halyqaralyq akademııasynyń baspasóz qyzmeti habarlady.

Músin  batyrdyń 320 jyldyq mereıtoıyna oraı jasalǵan. Tuǵyrynan bastap, ustaǵan týynyń ushyna deıingi bıiktigi 7 metr bolatyn eskertkish Ulanbatyr qalasynda, batyr urpaqtarynyń qarjysyna jasalǵan. Eskertkishke Ólgeı qalasynyń ákimdigi arnaıy jer telimin bóldi. 

Eskertkishtiń ashylý saltanatyna aımaq basshysy Ǵylymhan Aıyp, aımaqtyq quryltaı basshysy Baýyrjan Dáleluly, zııaly qaýym ókilderi, Qazaqstannan barǵan batyr urpaqtary men jergilikti turǵyndar qatysty. Eńseli eskertkishke «Qojabergen batyr Jánibekuly - 320 jyl»  dep jazylǵan.

Uıymdastyrýshylar bolashaqta eskertkishtiń qos qaptalyna batyrdyń jońǵar hanzadasy Ámirsanamen birge qytaıǵa qarsy júrgizgen joryqtary jaıly arhıvte saqtalǵan  qujattardan  úzindiler jazylǵan taqta ornatýdy josparlap otyr. Arhıvterden, ásirese Qytaıdaǵy Tsın patshalyǵynyń ortalyq arhıvinen Qojabergen batyr Jánibekuly men Ámirsananyń  1756-57 jyldary birge júrgeni, Aıagóz óńirinde bolǵan qazaq-qytaı shaıqasynan soń Tsın ımperııasynyń áskerlerine qarsy tize qosa kúres  júrgizgeni, keıin Qojabergen batyrdyń Qazaq handyǵy men Qytaıdyń arasyndaǵy saýda-sattyqta belsendi ról atqarǵany týraly derekter tabylǵan.

Bıyl batyrdyń týǵanyna 320 jyl tolyp otyr. Osyǵan oraı Mońǵolııada bastalǵan  shara Astanada jalǵasyp, 19 qazanda QR Qorǵanys  mınıstrligi Áskerı-tarıhı mýzeıi men Sh.Ýálıhanov atyndaǵy Tarıh jáne etnologııa ınstıtýty birlesip, batyrǵa arnalǵan halyqaralyq konferentsııa ótkizýdi josparlap otyr. Batyrdyń shapanyn urpaqtary bıyl Áskerı-tarıhı mýzeıine tapsyrsa,  joryqta ustaǵan týy Mońǵolııanyń Baıan-Ólgeı aımaǵyndaǵy urpaqtarynyń qolynda saqtaýly.