Baıan-Ólgeı men Qazaqstan arasynda jańa áýe baǵyttary ashylýy múmkin
ASTANA. QazAqparat - Mońǵolııa men Qazaqstan arasynda jańa áýe baǵyttary ashylýy múmkin. QR Premer-Mınıstr Kárim Másimov Úkimet otyrysy barysynda osyndaı múmkindikti qarastyrýdy tapsyrdy.
«Investıtsıalar jáne damý mınıstrligi Baıan Ólgeı-Almaty, Baıan Ólgeı-Óskemen arasynda áýe qatynasyn ashý týraly máseleni zerttesin», - dep atap ótti K.Másimov.
Sondaı-aq, ol Aýyl sharýashylyǵy mınıstrligine - Mońǵolııada Semeı et kombınatyna arnap et satyp alý, sondaı-aq mal sharýashylyǵy klasterin qurý múmkindigin qaraý tapsyryldy. Syrtqy ister mınıstrligine Baıan-Ólgeıde konsýldyq qyzmet ashý jáne oǵan qosa Ulanbatyr qalasynda Qazaqstan elshiliginiń ǵımaratyn salý tapsyryldy.
«Bilim jáne ǵylym mınıstrligi Mońǵolııa azamattaryna elimizdiń joǵary oqý oryndaryna bólinetin kvotany kóbeıtý máselesin qarastyrsyn. Syrtqy ister mınıstrligi osy tapsyrmalardyń oryndalýyn baqylaýǵa alyp, tıisti aqparatty Premer-Mınıstrdiń Keńsesine engizsin», - dep atap ótti ol.
Eske salsaq, ótken aptada Memleket basshysy Nursultan Nazarbaevtyń tapsyrmasymen K.Másimov 10 shildede sel kóshken Mońǵolııadaǵy Baıan-Ólgeı aımaǵyndaǵy (okrýg) Ólgeı qalasyna bardy. Tótenshe jaǵdaı nátıjesinde 100-den astam úı qırap, 700 adam baspanasyz qaldy.
Ólgeı qalasyndaǵy qazaq dıasporasynyń ókilderimen kezdesýde K.Másimov Prezıdent N.Nazarbaevtyń tapsyrmasymen QR Úkimeti sel kóshkininen zardap shekken otbasylarǵa qarjylaı kómek kórsetiletinin málimdegen bolatyn.
