Baıan Esentaevanyń toby «Gúl ápshe» úshin rýmyn mádenı ortalyǵynyń aldynda jaýap beredi
ASTANA. QazAqparat - «Gúl ápshe» áni tóńiregindegi daý qyza tústi, dep jazady «juldyzdar» ómiri týraly jazatyn baistars.kz saıty.
Buǵan deıingi aqparattarda Baıan Esentaevanyń prodıýserligindegi «Alaý» toby «Gúl ápshe» ánin 30-shy jyldary rýmyn ánshisi Marııa Leteretsýdyń áninen kóshirip alǵandyǵy habarlanǵan. Naqtyraq aıtqanda, «alaýlyqtar» ánniń ózgertilgen nusqasy «Ro-Manııa» tobynyń áýenin alǵan. Bastapqyda bul uqsastyqty Gakku arnasy baıqap, jigitterdi «urlyq jasady» dep jarııalaǵan.
Al, Baıan Esentaeva bul jaǵdaıdy jaýapsyz qaldyrmaı, án urlyq emes, kaver nusqa ekenin jetkizdi. Jáne bul aıyptaýy úshin Gakku arnasy keshirim surasyn dep saldy. Al «Gakku» arnasy keshirim suramaq túgil, beınebaıandy óz «Youtube» arnasynan alyp tastady.
Buǵan sebep te joq emes, «Gakku» arnasyna Rýmyn mádenı ortalyǵynyń negizinde qurylǵan «Dakııa» etnofolklorlyq ansabldiń solısi habarlasqan.
Dál osy ansambl osy ándi Qazaqstan terrıtorııasynda shyrqaýǵa ruqsat alǵan.
«Bárimiz Qazaqstannyń patrıotymyz jáne memleketimizdiń zańdaryn ustanýymyz tıis, basqalardyń quqyǵyn taptamaýymyz kerek! Baıan Esentaeva bastapqyda kaver dep aıtpady, rýmyn tobynyń aranjırovkasyn taza kúıinde alyp alǵan. «Ro-Manııa» tobymen biz jaqsy qarym-qatynastamyz. Biz qoǵamdyq qaýymdastyq bolǵandyqtan kontsertterimizden esh paıda tappaımyz, olaı bolsa nege quqyǵymyzdy qorǵamaýymyz kerek?!» - dep jazdy Aleks Mýrashev esimdi ansambl solısi «Gakku» arnasynyń jeke paraqshasyna.
Sonymen birge, bul ánniń plagıat ekeni anyqtalǵanda ǵana Baıan Esentaeva kaver heshtegin qosqandyǵy jaıly jazǵandar kóp. Oǵan qosa, kaver nusqa eshqashan taza nusqasyn qaıtalamaýy kerek, oǵan beınebaıan túsirilmeıdi jáne arnalarǵa rotatsııaǵa jiberilmeıdi, tek oryndaýshynyń jeke toptamasynda turýy tıis degender de tabyldy.
B.Esentaeva bul ándi bir kezderi Edıt Pıaf ta oryndaǵanyn alǵa tartqan, alaıda málim bolǵandaı Edıt Pıaf osy ándi oryndaǵan saıyn avtorǵa gonorar tólep otyrǵan.
Rýmyn mádenı ortalyǵynyń múshesi jaqynda osy ánniń aranjırovkasyn jasaǵan avtorlar Qazaqstanǵa keletinin málim etti. Kelgen boıda Baıan Esentaevamen dıalog júrgizbek. Jáne Gakku arnasyna olardy qoldaǵany úshin alǵys bildirdi.
