Baıan Esentaeva «Mýz-TV-nyń» Bas dırektoryna kelesi jyly muqııat bolýǵa keńes berdi
ASTANA. QazAqparat - Prodıýser Baıan Esentaeva «Instagram» áleýmettik jelisindegi jeke paraqshasynda «Mýz-TV» telearnasynyń Bas dırektory Arman Dáýletıarovtyń oǵan «jaqsy án tyńdasyn» degen jaýabyna qatysty óz pikirin bildirdi.
«Arman Dáýletııarov baspasóz máslıhatynda maǵan «jaqsy án tyńdasyn» dep keńes beripti. Rahmet, Arman. Tamasha keńes, biraq sál keshigip jetkeni bolmasa. Men mýzykanttar otbasynda dúnıege kelgenmin. Men qandaı ánderdi tyńdap ósti dep oılaısyz? Es bilgeli jata jastana tyńdaǵan ánshilerimdi tizip kóreıin: Stıvı Ýander, Ýıtnı Hıýston, Bıllı Holıdeı, Daıana Ross, Elton Djon, Maıkl Djekson, bul men táýlik boıy jalyqpaı tyńdaǵan ánshilerimniń bir parasy ǵana. Onyń barlyǵy beker emes dep te oılaımyn, ony meniń jetekshiligimmen shyǵyp júrgenderdiń shyǵarmashylyǵynan baıqaýǵa bolar. Biraq siz ony qaıdan bilesiz? Jaqynda ǵana sizdiń bir suhbatyńyzdan bizden tek L dýetin ǵana biletinińizdi oqydym. Ókinishti-aq. Men sizge bizdiń ánshilerdiń shyǵarmashylyqtarymen jan-jaqty tanysyńyz degen keńes bergim keledi. Olardyń ishinde kásibıleri de, talanttylary da bar. Men sizge sáttilik tileımin. Bıylǵy ketken kemshilikterdi eskerip, kelesi jyly barlyǵyn jan-jaqty oılastyrasyz dep oılaımyn. Oqyrmandaryma aıtarym, bul jazbamdy arandatý dep qabyldamańyzdar. Men, Armandy jáne onyń eńbegin syılaımyn. Barlyǵyńyzǵa jaqsylyq pen beıbitshilik bolsyn!» dep jazǵan Baıan Esentaeva.
