Baıan Esentaeva «KeshYOU» toby týraly komedııa túsirmek
ASTANA. QazAqparat - Tanymal telejúrgizýshi jáne prodıýser Baıan Esentaeva Qazaqstan estradasyndaǵy tanymal toptardyń biri - «KeshYOU» týraly fılm túsirýdi josparlap otyr. Bul týraly ol óziniń Instagram-daǵy paraqshasynda jazǵan.
«Biz «KeshYOU» toby týraly kıno túsiremiz! Bul kópshiliktiń súıikti toby týraly romantıkalyq komedııa bolady! Eldiń barlyq kınoteatrlarynan kútińizder», - deıdi ol belgili rejısser ári áriptesi Asqar Uzaqbaev beınelengen sýretke jazǵan pikirinde. Bul B.Esentaeva men A.Uzaqbaevtyń birlese qolǵa alǵan birinshi jobalary emes. Máselen, 2010 jyly otandyq ekranǵa «Ǵashyq júrek» fılmi shyqqan bolatyn. Rejısser sonymen birge «Výzerler» atty telehıkaıasymen tanyldy. Al Baıan Esentaeva «KeshYOU» jáne «Lashyn» toptarynyń prodıýseri.
Aıta keteıik, «KeshYOU» toby «Astana juldyzy» mýzykalyq syılyǵynyń nusqasy boıynsha sońǵy eki jyl qatarynan otandyq estradaǵy úzdik áıelder ujymy retinde moıyndaldy.
