Baıan Esentaeva: KeshYou-de tek talanttylar án salady
ASTANA. QazAqparat - Ataqty telejúrgizýshi jáne prodıýser Baıan Esentaeva ınstagram jelisi arqyly eldegi ataqty «KeshYou» toby quramynyń ózgerýine qatysty syn aıtyp júrgen adamdarǵa arnap jazba jarııalady. «Dostar, Keshıý tobyndaǵy ár qyz daryndy, ózderine ǵana tán qasıetteri bar. Olardy salystyrýdyń qajeti joq. Keshıý sizder úshin on jyl jumys istep keledi. Olar árdaıym sizderdi tań qaldyrýǵa tyrysty», - dep jazdy B.Esentaeva.
Prodıýser bul top shyǵarmashylyq turǵyda sheberligin shyńdaı túsetinin aıtty. «Búginde Keshıý eldegi myqty, daryndy, súıikti toptardyń biri. Onyń quramy aldaǵy ýaqytta da ózgeredi. Qyzdarymdy, komandamyzdy syılaýlaryńyzdy suraımyn. Keshıý tobynyń quramynda árdaıym eń daryndy qyzdar án aıtatyn bolady!» - dep túıdi ol. Eske sala keteıik, shilde aıynyń ortasynda Baıan Esentaeva «KeshYou» tobynyń burynǵy múshesi Móldir Áýelbekova ujym quramyna oralatynyn aıtqan. Janar Doǵalova, kerisinshe, jeke ánshilikpen aınalysatynyn aıtqan. Bul jańalyqty top ónerine tabynýshylar ár túrli qabyldady. Basym bóligi toptyń ár múshesin salystyryp, olarǵa qatysty syn aıta bastaǵan.
«KeshYou» «Astana Juldyzy» ulttyq mýzykalyq premııasy óner dodasynda ekinshi jyl qatarynan úzdik qyzdar toby atanýda.
