Baıan Esentaeva Astanada «Qazaq arýy» baıqaýyna kastıng ótkizedi
ASTANA. QazAqparat - Belgili telejúrgizýshi jáne prodıýser Baıan Esentaeva jyl saıynǵy «Qazaq arýy» baıqaýyna kastıng jarııalady.
«28 jáne 29 qańtarda elordada «Qazaq arýy» baıqaýyna kastıng ótedi. Eger sizdiń boıyńyz 170 sm kem bolmasa, shashyńyz uzyn bolyp, salmaǵyńyz 55 keliden aspasa, sonymen qatar qazaq tilin jaqsy meńgerip, qazaq halqynyń ádet-ǵurpyn jaqsy bilseńiz, biz sizdi kútemiz! Mekenjaıymyz: Imanov kóshesi, 26, saǵat 12.00 - 19.00 deıin. Sáttilik!» - dep jazdy ol óziniń Instagram-daǵy paraqshasyna.
Prodıýser úmitkerler mindetti túrde shyǵarmashylyq nomer daıyndaýy kerek ekendigin atap ótti. Aqpan aıynda Almatyda da kastıng ótedi. Onyń ótý merzimi týraly qosymsha habarlanady.
Eske sala keteıik, «Qazaq arýy» baıqaýy 2010 jyldan ótkizilýde. Ideıa avtory - Baıan Esentaeva. Alǵashqy úsh jylda baıqaý Almaty qalasynda ótken. Al 2014 jyly Astanada uıymdastyryldy.
