Baıan Alagózova mıýzıkldiń nege «Sısıtaı» atalǵanyn túsindirdi
ALMATY. QazAqparat - Baıan Alagózova joqshylyqty da toqshylyqty da kórgen qyzdyń armanǵa jeter joly týraly taǵy bir kıno túsirdi. Jańa týyndyǵa ol «Sısıtaı» dep at qoıypty, dep habarlaıdy «QazAqparat» HAA tilshisi.
«Sısıtaı - qazaq qyzynyń aty, fılmniń basty keıipkeri. Álemdik deńgeıdegi ártis C. C. Catch esiminen alynyp, qazaqsha erkeletip aıtylady. Ony Gýlıa ne Sáýle nemese Dına dep ataıtyn bolsaq eshqandaı ereksheligi bolmas edi. Fılmdi kórip bolǵan adamdar Sısıtaı degen álemdegi eń meıirimdi esim ekenine kózderi jetedi», - dedi Baıan Alagózova Almatyda ótken «Sısıtaı» mıýzıkliniń premerasynda.
Prodıýsserdiń kınoqorjynynda buǵan deıin túsirilgen shoý bıznes áleminen syr shertetin «Juldyzǵa arnalǵan kokteıl» fılmi bar. Bul joly Baıan Alagózova tolyqqandy mıýzıkl jasap shyǵarǵan.
Sıýjetke sáıkes Sısıtaı esimdi aýqatty bıznesmenniń qyzy ákesiniń qarsylyǵyna qaramastan ánshi bolýdy armandaıdy. Keıin ákesi dúnıeden ótken soń ógeı sheshesi ony úıden qýyp shyǵady. Qolyna ilingen qara jumystyń bárin atqaryp nan taýyp júrgen qyz oıda joqta áıgili prodıýser Alısa Maqsutqyzynyń kózine túsedi (onyń rólin Baıan Algózovanyń ózi somdaıdy).
25 kúnniń ishinde túsirilip 400 myń AQSh dollary jumsalǵan fılmde Baıan Alagózovanyń kúıeýi Tursynǵalı Alagózov te akter retinde boı kórsetedi. Jańa týyndy kópshilik nazaryna 8 naýryzda mereke kúni usynylmaq.
Avtor: Albert Ahmetov
