«Baıaǵy jartas – bir jartas»: Erlan Qoshanov Úkimettiń depýtattyq saýaldarǵa jaýaby jaıly
ASTANA. KAZINFORM – Depýtattyq saýaldarǵa memlekettik organdar syrǵytpa, ústirt jaýap beredi. Bul týraly Parlamenttiń 2-sessııasynyń jabylý rásiminde Májilis tóraǵasy Erlan Qoshanov aıtty.
«Depýtattyq saýaldarǵa beriletin jaýaptarǵa da arnaıy toqtalyp ótkim kelip otyr. Memlekettik organdardyń depýtattyq saýaldarǵa beretin jaýaby depýtattardyń kóńilinen shyǵa bermeıdi. «Baıaǵy jartas – bir jartas». Syrǵytpa, ústirt jaýap beriledi, naqtylyq joq. Onyń artynda qanshama azamattyń taǵdyry, talap-tilegi men muń-muqtajy turǵanyn túsingen jón», - dedi Erlan Qoshanov.
Májilis tóraǵasy Úkimet osy aıtylǵan máselelerge basa nazar aýdarýy kerektigin basa aıtty.
«Bizdiń jumysymyzda saılaýshylarmen tyǵyz baılanys ornatýǵa erekshe kóńil bólinedi. Osy sessııada Parlament depýtattary 800-ge jýyq eldi mekendi aralap, 2 000-ǵa jýyq kezdesý ótkizdi. Depýttar saılaýshylardyń máselelerin óz depýtattyq saýaldary arqyly jetkizip otyrady. Mysaly, osy sessııa barysynda Senat pen Májilis depýtattary Úkimet pen basqa da memlekettik organdarǵa 727 depýtattyq saýal joldady. Sondaı-aq Májilistiń qoǵamdyq qabyldaý qyzmeti depýtattar men halyq arasyndaǵy dánekerge aınaldy. Sessııa bastalǵaly beri qoǵamdyq qabyldaý qyzmetine 2 myńnan astam adam júgindi. Sonymen qatar depýtattarǵa turaqty túrde ótinishter de kelip túsedi. Osy sessııada 47 myńnan astam azamattyń haty qaraldy», - dedi palata spıkeri.
Sonymen qatar ol ózekti máselelerdi sheshý úshin óńirlerge shuǵyl saparmen barý depýtattyq qyzmettiń tıimdi tásili retinde ornyqqanyn aıtty.
«Bir sózben aıtqanda, halyqty tolǵandyratyn túıtkilder Úkimet pen ákimder aldyna ashyq túrde qoıylyp júr. Sessııa bastalǵaly beri Úkimet músheleri 2 ret arnaıy shaqyrylyp, saılaýshylardyń talap-tilegi otyrysta jan-jaqty qaraldy. Nátıjesinde azamattardyń suranysy eskerilip, memlekettik organdardyń qyzmetin retteıtin taǵy bir jumys tetigi paıda boldy», - dedi Erlan Qoshanov.
