Baı-manaptan tárkilengen qarajattyń 50 mlrd teńgesi «2-10-20» ıpotekalyq baǵdarlamasyna bóline me — Sklıar jaýaby
ASTANA. KAZINFORM — Premer-mınıstrdiń birinshi orynbasary Roman Sklıar Májilis depýtattarynyń Aktıvterdi qaıtarý komıteti tartqan qarajat esebinen «Otbasy bankiniń» «2-10-20» ıpotekalyq baǵdarlamasyna 50 mlrd teńge kóleminde qarjylandyrý múmkindigine qatysty saýalyna jaýap berdi.
Birinshi vıtse-premerdiń málimetinshe, Arnaıy memlekettik qordyń qarajatyn paıdalaný tártibi men monıtorıngi Qarjy mınıstri mindetin atqarýshynyń 2023 jylǵy 29 qyrkúıektegi № 1033 buıryǵymen bekitilgen «Arnaýly memlekettik qor qarajatyn paıdalaný jáne monıtorıngileý qaǵıdalarynda» aıqyndalady. Osy qaǵıdalardyń 5 jáne 6-tarmaqtaryna sáıkes, qor qarajaty esebinen qarjylandyrýǵa jatatyn áleýmettik jáne ekonomıkalyq jobalardyń tizbesi Ulttyq ekonomıka mınıstriniń 2023 jylǵy 20 qyrkúıektegi № 165 buıryǵymen bekitilgen Áleýmettik jáne ekonomıkalyq jobalardy irikteý jáne olardyń ólshemsharttaryn aıqyndaý qaǵıdalaryna sáıkes qalyptastyrylady.
— Bul rette qaǵıdanyń 6-tarmaǵyna sáıkes, memlekettik organdar men kvazımemlekettik sektordyń aǵymdaǵy bıýdjettik baǵdarlamalaryna jatatyn shyǵystar, sondaı-aq jergilikti atqarýshy organdarǵa, kvazımemlekettik sektor sýbektilerine, qarjylyq damý ınstıtýttaryna, ekinshi deńgeıdegi bankterge jáne mıkroqarjy uıymdaryna bıýdjettik nesıelerge qatysty shyǵystar qor qarajaty esebinen qarjylandyryla almaıdy. Osyǵan baılanysty «Otbasy bank» AQ-yna qor qarajaty esebinen qosymsha qarjylandyrý bólý múmkin emes, — dedi Roman Sklıar jaýabynda.
Sonymen birge, ol turǵyn úı-kommýnaldyq ınfraqurylymdy damytýdyń 2023-2029 jyldarǵa arnalǵan tujyrymdamasy aıasynda halyqty memlekettik qoldaýdyń túıindi sharalarynyń biri «2-10-20» (jyldyq 2%, bastapqy jarna 10%, merzimi 20 jyl) jáne «5-10-20» (jyldyq 5%, bastapqy jarna 10%, merzimi 20 jyl) memlekettik baǵdarlamalary arqyly azamattardyń jekelegen sanattaryna jeńildikti ıpotekalyq qaryzdar berý arqyly turǵyn úıdiń qoljetimdiligin qamtamasyz etiletindigin atap ótedi.
— Osy jyly 3 400 qaryz berý úshin 40,6 mlrd teńge kózdelgen. Búgingi kúni 29,6 mlrd teńgege 2 461 qaryz berildi (2% — 13,5 mlrd tengege 1 086 qaryz, 5% — 16,1 mlrd teńgege 1 375 qaryz). Jalpy, 2020 jyldan 2025 jylǵa deıingi kezeńde atalǵan baǵdarlamalardy qarjylandyrýǵa memleket tarapynan 490,6 mlrd teńge bólindi. Onyń ishinde respýblıkalyq bıýdjetten berilgen bıýdjettik nesıeler esebinen — 300,6 mlrd teńge, Ulttyq banktiń oblıgatsııalyq qaryz esebinen — 190 mlrd teńge. Atalǵan kezeńde jalpy somasy 730,9 mlrd teńgege 67 603 qaryz berildi (2% — 218,3 mlrd teńgege 18 953 qaryz, 5% — 512,6 mlrd teńgege 48 650 qaryz). 2024 jyldy qarjylandyrý 2023 jyldyń qaldyq qarajaty jáne aınalymdaǵy qarajat esebinen júzege asyryldy. Ol 81,3 mlrd teńgeni qurady jáne 6 884 qaryz berý josparlandy (2% — 55,3 mlrd teńgege 4 683 qaryz, 5% — 26 mlrd teńgege 2 201 qaryz), is júzinde 108,1 mlrd teńge somasyna 9 004 qaryz berildi (2% — 48,5 mlrd teńgege 3 859 qaryz, 5% — 59,6 mlrd teńgege 5 145 qaryz), — dep atap ótedi Roman Sklıar.
Buǵan deıin Májilis depýtattary «2-10-20» jeńildikti ıpotekalyq baǵdarlamasyna qatysýshylarǵa Qazaqstan Respýblıkasy Bas prokýratýrasynyń Aktıvterdi qaıtarý komıteti tartqan qarajat esebinen «Otbasy bank» aktsıonerlik qoǵamyn 50 mlrd teńge kóleminde qarjylandyrý múmkindigin qarastyrý usynǵan edi.
Aıta ketelik Otbasy bank pen Halyqaralyq qarjy korporatsııasy kelisim ornatqan edi.