Baı adamdardyń 40 paıyzy óz baılyqtarynyń jartysyn qaıyrymdylyqqa berýge ýáde berdi - AQSh
ASTANA. Tamyzdyń 5-i. QazAqparat - «Maıkrasovt» kompanııasynyń negizin qalaýshy Bıll Geıts pen tanymal ınvestor Ýorren Baffettiń óz baılyqtarynyń 50 paıyzyn kózderiniń tirisinde
nemese qaıtys bolǵannan keıin qaıyrymdylyq maqsatqa berý týraly bastamasyna AQSh-tyń taǵy 40 shaqty baı adam qoldaý bildirdi, dep habarlaıdy ITAR-TASS agenttigi.
Geıts pen Baffettiń bul ıdeıasyna Nıý-Iork meri Maıkl Blýmberg, meıramhana magnaty Berron Hılton, kınorejısser Djordj Lýkas, basqa da amerıkandyq qaltalylar qosylyp otyr. Eger de «Forbs» jýrnalynyń tizimindegi AQSh-tyń barlyq 400 baı-manaby olardan úlgi alsa, qaıyrymdylyqqa jınalatyn soma 600 mıllıard dollarǵa jetedi eken.
Biraq ta, bul bastamany barlyq baı adamdardyń qoldap otyrmaǵanyn aıta ketý kerek. «RIA «Novostı» agenttiginiń habarlaýynsha, baılyǵy 53,5 mıllıard dollarǵa baǵalanatyn álemniń qazirgi eń baı adamy, meksıkalyq magnat Karlos Slım bul úndeýge qosylmaıtynyn aıtyp otyr.
«Baılyqtyń teń jartysyn qaıyrymdylyqqa berý - aqylǵa syımaıtyn áreket. Ol qarajat qoldaryna tıetin adamdar ony laıyqty jumsaıdy dep eshkim nyq senimmen aıta almaıdy», - dep málim etti Slım. «Qaltalylardyń úlken áleýmettik problemalardy sheshýge qoldaý kórsetemiz degen talpynystaryn men tamasha túsinemin, biraq bulaı emes. Aqsha mańyzdy áleýmettik baǵdarlamalarǵa arnaıy bólinýi jáne olardy júzege asyrýǵa naqty jáne quzyrly adamdardyń jaýap berýleri kerek», deıdi Slım myrza.
Degenmen, bul Slım myrza sarań degen sóz emes. Mýltımıllıarder jastarǵa arnalǵan bilim jáne medıtsınalyq baǵdarlamalarǵa 4 mıllıard dollar bóldi. Ol sondaı-aq Meksıka men Latyn Amerıkasynyń basqa elderinde shaǵyn kásipkerlikti damytýǵa júzdegen mıllıon dollar jumsap keledi.
