«Bavı» taıfýny Japonııanyń Okınava araldaryna jetti
ASTANA. KAZINFORM – Qýatty «Bavı» taıfýny senbi kúni Japonııanyń Okınava prefektýrasyndaǵy Sakısıma araldaryna jetti. Osyǵan baılanysty Japonııanyń Meteorologııalyq agenttigi turǵyndardy qatty jel, nóser jańbyr, bıik tolqyndar men teńiz deńgeıiniń kóterilý qaýpine baılanysty saq bolýǵa shaqyrdy, dep habarlaıdy Jiji Press.
Jergilikti ýaqyt boıynsha saǵat 12:50-degi málimetke sáıkes, bıylǵy toǵyzynshy taıfýnnyń ortalyǵyndaǵy atmosferalyq qysym 950 gektopaskal boldy. Jeldiń turaqty jyldamdyǵy sekýndyna 40 metrge, al ekpini sekýndyna 55 metrge deıin jetken.
Mııako aralynda tańǵy saǵat 03:50 shamasynda jeldiń ekpini sekýndyna 40 metrge jetse, Isıgakı aralynda saǵat 03:40-tan keıin bul kórsetkish sekýndyna 34 metr bolǵan.
Sımodzı aralynda tańǵy saǵat 09:20-ǵa deıingi sońǵy 24 saǵat ishinde 154,5 mıllımetr jaýyn-shashyn túsken.
Boljam boıynsha, taıfýn tún ortasynan keıin Qytaıdyń qurlyq bóligine jetip, seısenbi kúni tańerteń tropıkalyq tsıklonǵa deıin álsireıdi.
Buǵan deıin Taıvanǵa soqqan «Bavı» taıfýny saldarynan keminde 36 adamnyń jaraqat alyp, 14 myńnan astam turǵynnyń evakýatsııalanǵan edi.
Sondaı-aq Japonııada «Bavı» taıfýnyna baılanysty júzdegen áýe reısi toqtatyldy.
