Bavarııada vokzal janynda qýatty jarylys boldy
NUR-SULTAN. QazAqparat – Bavarııanyń Gıýntsbýrg qalasyndaǵy temirjol vokzalynyń janynda ornalasqan bos ǵımaratta qýatty jarylys boldy. Oqıǵa saldarynan 11 adam zardap shekti. Bul týraly QazAqparat agenttigi RTL telearnasyna silteme jasap habarlaıdy.
Keıinirek zardap shekkender jaqyn mańda jumys istep jatqan qurylysshylar ekeni belgili boldy.
Jarylys 100 metr radıýstaǵy birneshe ǵımaratty zaqymdady. Sonymen qatar 30 vagon men temirjolǵa zalal keldi.
«Temirjol vokzaly jabyldy, Aýgsbýrg pen Ýlm arasyndaǵy poıyzdar toqtatyldy», - delingen telearna habarlamasynda.
Boljam boıynsha, tótenshe jaǵdaıǵa gaz ballonynyń detonatsııasy sebep bolǵan.
Oqıǵa ornynda quqyq qorǵaýshylar men qutqarý tikushaǵy jumys istep jatyr.
