Bavarııa Qazaqstanmen saýda-sattyqty jandandyrýda aıryqsha ról atqarady - Prezıdent
ASTANA. KAZINFORM – Qasym-Jomart Toqaev Bavarııa Landtagynyń Tóraǵasy Ilze Aıgnermen kezdesti, dep habarlaıdy Aqorda.
Kezdesý barysynda Prezıdent Germanııanyń joǵary basshylyǵymen bir kún buryn Berlınde júrgizilgen kelissózder tabysty ári nátıjeli sıpatta órbigenin atap ótti.
Qazaqstan Prezıdenti Bavarııanyń san qyrly qazaq-german qarym-qatynasyn nyǵaıtýǵa qosqan úlesin joǵary baǵalaıtynyn aıtty.
– Bavarııa Qazaqstanmen saýda-sattyqty jandandyrý jáne baılanystardy damytýda aıryqsha ról atqarady. Germanııa – elimizdiń mańyzdy seriktesi, Eýropadaǵy jáne odan tysqary jerlerdegi strategııalyq áriptesi sanalady. Óıtkeni elińizdiń yqpaly men róli, jetistikteri Eýropa aýmaǵynan da alysqa taralǵan. Biz buǵan senimdimiz. Germanııa – ekonomıkasy jaǵynan álemdegi úshinshi el, – dedi Qasym-Jomart Toqaev.
Áńgimelesý barysynda parlamentaralyq yqpaldastyq máseleleri qozǵalyp, mádenı-gýmanıtarlyq baılanystardy nyǵaıtý perspektıvasy talqylandy.
Ilze Aıgner sapar baǵdarlamasynyń tyǵyzdyǵyna qaramastan Bavarııa Landtagyna kelýge ýaqyt tapqany úshin Memleket basshysyna alǵys aıtty.
Landtag Tóraǵasynyń aıtýynsha, Bavarııa Qazaqstanmen saýda-ekonomıkalyq, kólik jáne ınvestıtsııalyq baılanystardy nyǵaıtý múmkindikterin muqııat zerdeleıdi.
Prezıdent pen Landtag Tóraǵasy kezdesý sońynda Qazaqstan men Bavarııa arasyndaǵy mazmundy dıalogty keńeıtýge múddeli ekenin rastady.
Aıta keteıik, Qasym-Jomart Toqaev Bavarııa Premer-mınıstrimen kezdesti.
