Bavarııa bıznesi Qazaqstanmen ózara tıimdi kooperatsııany damytýǵa qyzyǵýshylyq tanytty
ASTANA. KAZINFORM – Memleket basshysy Bavarııa Premer-mınıstriniń orynbasary – Ekonomıka, óńirlik damý jáne energetıka mınıstri Hýbert Aıvangermen kezdesý ótkizdi, dep habarlaıdy Aqorda.
Áńgimelesý barysynda Prezıdent Qasym-Jomart Toqaev qonaqjaılyq tanytqany jáne Mıýnhende tehnologııalyq forým ótkizýge qoldaý kórsetkeni úshin Hýbert Aıvangerge alǵys aıtty.
Kezdesýde Qazaqstan men Bavarııa kompanııalary arasyndaǵy tikeleı iskerlik baılanysty nyǵaıtý jáne tehnologııalyq seriktestikti keńeıtý perspektıvasy talqylandy.
Germanııa aımaqtarynyń arasynda Bavarııa Qazaqstannyń negizgi ekonomıkalyq seriktesi sanalatyny atalyp ótti.
Memleket basshysynyń pikirinshe, saýda-sattyqty ulǵaıtý, ınvestıtsııa tartý jáne birlesken jobalardy iske asyrý baǵyttarynda áleýet jetkilikti.
Hýbert Aıvanger Bavarııa bıznesiniń ózara tıimdi kooperatsııany damytýǵa aıryqsha qyzyǵýshylyq tanytatynyn jetkizdi. Onyń pikirinshe, eki el ekonomıkasynyń ózara úılesimdiligi – Bavarııa kompanııalary úshin úlken múmkindik.
Qasym-Jomart Toqaev pen Hýbert Aıvanger joǵary tehnologııa, ónerkásip, energetıka, ınnovatsııa jáne óńirlik damý salalaryndaǵy yntymaqtastyqqa basa nazar aýdardy.
Sonymen qatar Qazaqstan men Bavarııa yqpaldastyǵynyń mazmunyn arttyrýǵa nıetti ekenin rastady.
t.me/aqorda_resmi
