Bavarııa basshysy EO-ny ishten janatyn qozǵaltqyshy bar kólikterge tyıym salýdan bas tartýǵa shaqyrdy
ASTANA. KAZINFORM – Bavarııa premer-mınıstri Markýs Zeder Eýropalyq odaqty ishten janatyn qozǵaltqyshy bar jańa avtomobılderge tyıym salý josparynan tolyq bas tartýǵa shaqyrdy, dep habarlaıdy BILD.
Buǵan Mıýnhen tehnıkalyq ýnıversıtetiniń jańa zertteýi sebep bolǵan. Zertteý avtorlary avtomobıldiń búkil ómirlik tsıklin esepke alǵanda, elektromobılder ishten janatyn qozǵaltqyshy bar kóliktermen salystyrǵanda kómirqyshqyl gazynyń shyǵaryndylaryn orta eseppen shamamen 41%-ǵa ǵana azaıtady degen qorytyndyǵa kelgen.
Markýs Zederdiń pikirinshe, bul Eýropanyń avtomobıl ónerkásibine qatysty saıasatyn qaıta qaraý qajettigin kórsetedi.
– EO-nyń ishten janatyn qozǵaltqyshtarǵa tyıym salý josparynan tolyq bas tartý shuǵyl qajet ekeni taǵy da belgili boldy. Muny ǵylymı zertteýler de rastap otyr, – dedi Bavarııa premer-mınıstri BILD basylymyna.
Onyń aıtýynsha, Eýropaǵa qatań tyıymdardan góri túrli tehnologııalardy qatar damytýǵa múmkindik beretin beıtaraptyq qajet.
– Eýropaǵa avtomobıl qajet. Transformatsııa, árıne, bolady, biraq ony tyıymdar arqyly emes, tehnologııalarǵa ashyq bolý arqyly júzege asyrǵan durys. Biz eń mańyzdy salalarymyzdyń birin odan ári álsiretpeýimiz kerek, – dedi Markýs Zeder.
Máseleniń taǵy bir mańyzdy tusy – avtomobıl ónerkásibindegi jumys oryndary. BILD tanysqan Fraýngofer ınstıtýtynyń zertteýine sáıkes, 2040 jylǵa qaraı Eýropanyń avtomobıl ónerkásibindegi qazirgi 1,6 mln jumys ornynyń shamamen 726 myńy qysqarýy múmkin. Bul jalpy jumys oryndarynyń 45%-ǵa jýyǵyn quraıdy.
Zertteýde jumys oryndarynyń edáýir bóligi 2035 jylǵa deıin-aq qysqarýy yqtımal ekeni kórsetilgen.
Aıta keteıik, Bavarııa sý qoımasynan jylyna 1000 tonna aq sýtegin óndirý jobasy júzege asady.
