«Baýyrjandaı batyry bar el baqytty!» - respýblıkalyq basylymdarǵa sholý

***

«Aıqyn» gazetiniń jazýynsha, Keńes odaǵynyń tarıhta qalǵan eń sońǵy bahadúr batyry Baýyrjan Momyshulynyń alda kele jatqan 100 jyldyq mereıtoıyna oraı, alǵashqylardyń biri bolyp, Máskeýdegi qazaq elshiligi Reseı astanasyndaǵy aǵaıyndarmen birlese otyryp, batyr baba esimin ulyqtaǵan. «Máskeýde uıymdastyrylǵan bul shara Baýyrjan Momyshuly esiminiń tek óz elinde ǵana emes, kórshiles Reseı turǵyndary esinde de máńgilik saqtalǵanyn pash etti», dep jazady basylym. «Baýyrjandaı batyry bar el baqytty!» degen taqyryppen berilgen maqaladan atalǵan is-sharanyń qalaı ótkendigin egjeı-tegjeıli oqı alasyzdar.

«Ankaradan Ahmet keldi». Osy taqyryppen «Aıqyn» gazetinde jarııalanǵan maqalaǵa elimizge QR Memlekettik hatshysy - Syrtqy ister mınıstri Qanat Saýdabaevtyń shaqyrýymen kelgen Túrkııanyń Syrtqy ister mınıstri Ahmet Dáýitulynyń resmı sapary arqaý bolǵan. Basylymnyń jazýynsha, Túrkııa syrtqy ister vedomstvosy basshysynyń elimizge sapar baǵarlamasy sheńberinde Astana men Ankara arasyndaǵy saıası, ekonomıkalyq, mádenı-gýmanıtarlyq yntymaqtastyq máselelerin talqylaý úshin Qazaqstan basshylyǵymen birqatar kezdesýler josparlanǵan. Sonymen qatar maqalada elimiz táýelsizdik alǵannan beri ornyqqan eki el arasyndaǵy dıplomatııalyq qarym-qatynastarǵa keńinen toqtalǵan.

«Aıqyn» basylymy ótken beısenbide jaryq kórgen nómirinde qazirgi ýaqytta tórtkúl dúnıe qulaq túrip otyrǵan qysqy Olımpıada oıyndarynyń tarıhy jaıynda qysqasha baıandaǵan bolatyn. Al osy nómirinde basylym tilshisi KSRO quramasy sapynda elimiz 1980 jyly Leık-Plesıdte, 1984 jyly Saraevoda, 1988 jyly Kalgarıde, 1992 jyly Albervılde qalaı óner kórsetti, al Qazaqstan táýelsizdik alǵannan keıin 1994 jyly Lıllehamerde, 1998 jyly Naganoda, 2002 jyly Solt-Leık-Sıtıde jáne 2006 jyly Týrınde nendeı tabystarǵa jetti degen saýaldarǵa jaýap bergen.

***

Elorda ákimi Imanǵalı Tasmaǵambetov pen «Samuryq-Qazyna» AQ ál-aýqat qorynyń basqarma tóraǵasy Qaırat Kelimbetovtiń tóraǵalyǵymen keńes ótkenin jazǵan «Astana aqshamy» gazetiniń habarlaýynsha, basqosý daǵdarysqa qarsy sharalar sheńberinde «Samuryq-Qazyna» qory qarjylandyrǵan Astana qalasyndaǵy úlestik qurylys nysandaryn 2010 jyly aıaqtaý máselelerine arnalǵan.

Úlestik qurylys salasyndaǵy túıtkilder jaıynda egjeı-tegjeıli bilgińiz kelse, basylymnyń búgingi sanyndaǵy «Úleskerler úmiti ústem» degen taqyryppen basylǵan maqalaǵa nazar aýdaryńyz.

«Kúres dese ishken asyn jerge qoıatyn qarǵa tamyrly qazaǵymyz tabıǵatynan kúreske jaqyn halyq» dep bastaǵan «Astana aqshamy» gazetiniń kelesi maqalasy «Qazaq kúresiniń qaranary» degen taqyryppen berilgen. Basylymnyń nysanaǵa alǵan palýany - Qazaqstannyń eńbek sińirgen sport sheberi, jasóspirimder jáne jastar arasyndaǵy respýblıka birinshiliginiń birneshe dúrkin jeńimpazy, qazaq kúresi, sambo jáne dzıýdo kúresterinen Qazaqstannń chempıony, Azııa chempıony, qazaq kúresinen álem chempıony Ǵanı Seıdildaev. Maqalada palýannyń sporttaǵy jetistikterine keńinen sholý jasalǵan.

***

«Nur Astana» basylymy óziniń ótken nómirinde dombyrany serik etken birqatar ónerpazdardyń qazaqtyń ulttyq aspaby týraly oı-pikirlerin usynǵan bolatyn. Al osy joly gıtaranyń «qulaǵynda oınaıtyn» óner tarlandarynyń pikirleri toptastyrylyp berilgen.

Osy basylymda qoǵam qaıratkeri Altynbek Sársenbaıulynyń birqatar oı-tolǵamdary jarııalanyp otyr. Máselen, onyń «qazaq tili qalaǵa keldi degen sóz - memlekettik til dárejesin kóterýge sheshýshi qadam jasaldy degen sóz», «Eýroodaq degenimiz ne? Bul - damyǵan memleketterdiń odaǵy. Biz sol eýropalyq standarttarǵa saı bolsaq, onda bizdiń ultymyzdyń da, memleketimizdiń de damý dárejesi Eýropa halyqtarynyń dárejesimen teń bolady. Biz jaqsylyqqa, ilgeri damýǵa umtylýymyz kerek» degen sııaqty oı-tolǵamdary berilgen.

«QR Prezıdenti N.Nazarbaev «Jańa onjyldyq - Jańa ekonomıkalyq órleý - Qazaqstannyń jańa múmkindikteri» atty Qazaqstan halqyna Joldaýynda: «Bizdegi jazalaý júıesindegi aıyppuldar 5 paıyzdan az, túzetý jumystary - 0,4 paıyz, qoǵamdyq jumystar - 0 paıyz. Qazir jazalaýdyń negizgi túri - bas bostandyǵynan aıyrý bolyp otyr. Túrmeden bosaǵandardy eshkim baqylamaıdy, sonyń nátıjesinde olar qylmyskerler qataryn kóbeıte túsedi», - dep atap ótken bolatyn», dep jazady «Alash aınasy» gazeti. Osyǵan oraı basylym sottalǵandarǵa raqymshylyq jasalǵan kúnde neden utamyz, neden utylamyz degen saýaldarǵa jaýap bergen. Basylymnyń paıymdaýynsha, utatynymyz: abaqtylarda tolyp ketken sottalǵandar sanyn azaıtyp, túzetý mekemeleriniń normalaryn saqtap, eýrostandartqa sáıkestendirýge bolady, osy arqyly sheteldikterdiń synı kózqarasyn ońaltamyz, bıýdjet qarjysyn únemdeımiz, adamgershilik qaǵıdalaryn ulyqtaıtyndyǵymyzdy kórsetemiz, al utylatynymyz: beıimdeý ortalyqtary bolmaǵandyqtan, olar qaıta qylmys jasap, qylmyskerler sany kúrt ósýi múmkin, túrmede týberkýlezge shaldyqqandar bostandyqqa shyqqan soń, qadaǵalaýdan tys qalyp, aýrý taratýy yqtımaldyǵy joǵary bolmaq.

Qazaqstan mys óndirisiniń alpaýyty «Qazaqmys» kompanııalar tobyn da daǵdarys aınalyp ótpegendigin jazǵan «Alash aınasy» gazeti oǵan dálel retinde birneshe derek keltirgen. Máselen basylymnyń keltirgen derekterine qaraǵanda, Qazaqstannyń taý-ken ónerkásibi daǵdarystyń aldynda, ıaǵnı 2008 jyly 5 paıyzǵa artyq ósim kórsetti. Degenmen byltyrǵy jyldyń ekinshi jartysynda óndiris qarqynynyń tómendeýi 4,5 paıyzdy quraǵan. Túrli-tústi metallýrgııa óndirisinde ónim kólemi 9 paıyzǵa azaıǵan. «Jezqazǵan túrli-tústi metaldar» óndiristik birlestigi «Qazaqmystyń» mys óndiretin eń iri bólimshesi bop tabylady. Birlestik basshylyǵy byltyrǵy jyldyń basynda jańa jaǵdaıǵa baılanysty arnaıy daǵdarysqa qarsy baǵdarlama qabyldap, qýat únemdeý, jumys ýaqytyn tıimdi paıdalaný sekildi sharalardy qolǵa alyp, shyǵyndardy aıtarlyqtaı azaıtqan. Basylymnyń naqty derekterdi arqaý óte otyryp jazǵan maqalasy «Otandyq metallýrgııa: Jezqazǵannyń mysyn túsimizde kórip júrmeıik» degen taqyrypppen basyldy.

«Ekonomıka» basylymynyń jazýynsha, taıaýda kórshi Qytaı elinde jaryq kórgen «Gúlbıke» fılminiń alǵashqy kórsetilimine Beıjińdegi alpys shaqty sheteldik dıplomat qatysqan. Olardyń ishinde Qazaqstan Respýblıkasynyń Qytaıdaǵy elshisi de boldy. Shyńjań-Uıǵyr avtonomııalyq aýdanynyń kórkem tabıǵaty aıasynda túsirilgen fılm qazaq qyzynyń ánshi bolý jaıly armanyn qalaısha júzege asyrǵany týraly áńgimeleıdi. Fılm etnıkalyq toptyń dástúrli ómir saltyn sýretteý úshin ejelgi aýyz ádebıeti stılin paıdalanǵan. «Qazaqstannyń Qytaıdaǵy elshisi Ikram Adyrbekov bylaı dedi: «Búgingi qoǵamda dástúrli mádenıetti saqtaý barǵan saıyn qıyn bolyp barady. Fılm rejısseri Shyńjańdaǵy qazaq etnıkalyq halqynyń dástúrli ómir saltyn túsirip alyp, kórsetýge tyrysyp, sonshalyqty syılaýǵa turarlyq talpynys jasaǵan». «Gúlbıke» Qazaqstanda taıaý ýaqytta resmı túrde kórsetiletin bolady», dep jazady basylym.

«Kazahstanskaıa pravda» gazetiniń habarlaýynsha, Memleket basshysy Nursultan Nazarbaev Qazaqstan kásipkerleri forýmy keńesiniń tóraǵasy Raıymbek Batalovty qabyldaǵan. Kezdesý barysynda qazaqstandyq bıznesti damytý, sondaı-aq kásipkerlerdiń Qazaqstan ekonomıkasyn ındýstrııalandyrýǵa qatysý máseleleri talqylandy. Atap aıtqanda, saýda kásiporyndarynyń otandyq aýyl sharýashylyǵy ónimderin óndirýshilermen ózara is-qımyl tetikterin jetildirý qajettigi týraly sóz boldy», dep jazady basylym.

«Lıter» basylymynyń búgingi nómirinde TMD-ǵa qatysýshy memleketter Úkimet basshylary keńesi janyndaǵy Jaýynger ınternatsıonalıster isteri jónindegi komıtettiń tóraǵasy, Keńes Odaǵynyń Batyry Rýslan Aýshıevpen aradaǵy suhbat jarııalanǵan. Maqala avtory generaldyń aýǵan soǵysynyń basty sabaǵy kez kelgen problemany áskerı is-qımyldar arqyly emes, dıplomatııalyq, saıası, ekonomıkalyq tásildermen sheshý kerektigin túsindirýi boldy, armııa - álemde oılap tabylǵan asa dóreki kúsh degen sózderine basa nazar aýdarǵan.

Almaty qalasynyń ákimi A.Esimovtiń ońtústik astana turǵyndary aldyndaǵy eseptik kezdesýine «Lıter» jáne «Izvestııa-Kazahstan» basylymdary toqtalǵan. Turǵyndardyń san túrli saýaldaryna tuşymdy jaýap bergen qala basshysy taıaý arada Almatyda jańa ındýstrııalyq aýmaq qurylatyndyǵyn atap ótken.