Baýyrjan Turysbek esinen tanyp qalǵan fýtbolshynyń ómirine arasha tústi

– Baýyrjan, «Oqjetpes» fýtbolshysynyń esinen tanyp qalǵanyn qalaı bildińiz? Oqıǵanyń jaı-japsaryn aıtyp berińizshi.

– Kókshetaýlyq fýtbolshylar bizdiń qaqpaǵa aıyp dobyn oryndaǵan edi. Dopqa talas kezinde Darko Zorıch pen Valerıı Karshakevıchtiń bir-birin soqtyǵysqanyn kórdim. Bastapqyda jaı ǵana oıyn sáti dep oılaǵanmyn. Kenet, chernogorııalyq jartylaı qorǵaýshy Zorıchtiń tunshyǵyp bara jatqanyn baıqadym. Jaqyndap kelsem, býyny tartylyp, tilin jutqandaı kórindi. Darkonyń dál janynda turǵanmyn, oılanbastan qasyna jetip keldim.

– Mundaı sátterde alǵashqy medıtsınalyq kómek kórsetý qajet. Qandaı sheshim qabyldadyńyz?

– Boks tilimen aıtsaq, Zorıch «tereń nokaýtqa» tústi ǵoı. Ol sál bolmaǵanda tilin tistep tastar edi. Bir qyryna jatqyzyp, jaǵyn ashyp, tilin ustap turdym. Sol sátte esin jıyp, demala bastady. Dárigerler de jaǵdaıdy birden baǵamdap, oıynshyǵa kómektesti. Darkonyń esin jıǵanyn baıqaǵan soń, qolymdy shyǵaryp alyp, ary qaraı oıynǵa kirisip kettim.

– Qazir Darko Zorıchtiń jaǵdaıy qalaı? Sóılesken shyǵarsyz?

– Árıne, jaǵdaıyn bilip, amandyq surastym. Qansha jerden qarsylas bolǵanymyzben, kimge bolsa da, jamandyq tilemeısiń. Jeńis úshin talas júrgizemiz, biraq, oıynnan soń adamdyqty saqtaý bir bólek. Sportshy ólim men ómir arasynda jatqanda báseke týraly umytasyń, oǵan kómek kórsetý birinshi josparǵa shyǵady. Darkonyń ómirin saqtap qalǵanyma qýanyshtymyn. Onyń jaqsy sportshy, adal dos ekenine kúmánim joq.

– Sport bolǵan soń qıyndyǵy men qaıǵysy qatar júretini belgili. Dál osyndaı jaǵdaı buǵan deıin de kezdesti me?

– Bir-eki oqıǵa este qalypty. Birinshisi men fýtbolshy mansabymdy bastaǵan sátte boldy. Ol kezde «Suńqar» klýbynda oınaıtynmyn. Іshki birinshiliktiń bir kezdesýi ótip jatty. Áriptesimiz Evgenıı Nohrın oıyn ústinde basynan aýyr soqqy alyp, esinen tanyp qaldy. Qas-qaǵym sátte Aıdos esimdi qaqpashymen birge oǵan kómektese bastadyq. Qaıdan ekenin bilmeımin, Aıdos ashana qasyǵyn taýyp alyp, soqqy alǵan jigittiń tilin basyp turdy. Ony bir jaq qyryna jatqyzyp, dárigerler kelgenshe kómektese aldyq. Sondan keıin de osyndaı oqıǵa qaıtalandy. Shamamyz kelgenshe, qınalǵan adamǵa kómek kórsetýge tyrystyq. Jalpy fýtbolshynyń esin jııa almaı, býyny tartylyp jatsa, lezde bir qyryndatyp jatqyzý qajet. Tilin jutyp, tunshyǵyp qalmaýy úshin bul edáýir kómektesedi.

P.S. Ajalǵa arasha bolǵan fýtbolshylardyń qatarynda Baýyrjan Turysbektiń eks-áriptesi, Qostanaıdyń «Tobylynda» oınaıtyn Djaba Kankava da bar. Ol álem fýtbolynyń jankúıerleri arasynda «qutqarýshy» esimimen tanymal. 2014 jyly Kankava dop tebetin «Dnepr» men Kıevtiń «Dınamosyn» qabyldaıdy. Kezdesý barysynda shabýylshy Oleg Gýsev qaqpashy Denıs Boıkamen dopqa talasta qaqtyǵysyp, esinen tanyp qaldy. Sol ýaqytta oǵan qarsylas komandanyń oıynshysy Djaba Kankava kómekke keldi. Ol Gýsevtiń tilin jutyp qoıýyna múmkindik bermeı, alǵashqy kómek kórsetti.