Baýyrjan Retbaev «Qazaqstan daýysy» jobasynyń jeńimpazy atandy - VIDEO
ASTANA. QazAqparat - Baýyrjan Retbaev «Qazaqstan daýysy» jobasynyń jeńimpazy atandy.
«Qazaqstan» ulttyq arnasynan jarty jyldan astam ýaqyttan beri kórsetilip kele jatqan «Qazaqstan daýysy» telejobasy búgin aıaqtaldy. Jobanyń aqtyq synynda tálimgerleriniń qoldaýyna ıe bolyp, kórermenderdiń eń kóp daýysyn jınaǵan 4 úmitker baq synady. Olar: Baýyrjan Retbaev, Danııar Ismaılov, Indıra Edilbaeva jáne Maqsat Maqulbekov.
Fınaldyq básekeniń alǵashqy aınalymynda Indıra Edilbaeva Roza Rymbaevamen qosylyp án shyrqasa, Danııar Ismaılov «Qazaqstan daýysy» jobasynyń ótken maýsymdaǵy jeńimpazy Shaharızat Seıdahmetpen birge «Aǵajan» ánin aıtty. Almastyń shákirti Baýyrjan Retbaev halyqaralyq «Túrkvıjn-2014» baıqaýynyń jeńimpazy Janar Duǵalovamen «Sen emes» ánin oryndady. Al Medeý Arynbaevtyń shákirti Maqsat Maqulbekov opera juldyzy Súndet Baıǵojınmen birge «Jan ana» dep atalatyn ándi shyrqady.
Tórt úzdiktiń arasynan sýyrylyp shyqqan mańǵystaýlyq Baýyrjan Retbaev basqa aınalymdarda da kórermenniń eń kóp daýysyn jınap, jobanyń bas júldesi 5 mln. teńgege ıe boldy.
