Baýyrjan Momyshuly týraly fılm Sevastopoldegi halyqaralyq kınofestıvalde baǵyn synamaq
ASTANA. QazAqparat - 5 mamyr kúni «Habar» Agenttigi» AQ týyndysy Baýyrjan Momyshuly týraly tolyqmetrajdy kórkem fılmniń kórsetilimin soǵys ardagerleri men tyl eńbekkerleri tamashalady.
Jeńistiń 69 jyldyǵyna oraılastyrylǵan shara «Kazkommertsbank», «Bekker ı K» seriktestigi, «Fellını» meıramhanasynyń, «Anom de lıa roz» gúl satatatyn dúkender men «Kınopark» kınoteatrlar jelileriniń qoldaýymen júzege asyryldy. Ótken jyly «Habar» Agenttigi» AQ bastamasymen dańqty qolbasshy, batyr atamyz Baýyrjan Momyshuly týraly túsirilgen 4 serııaly telehıkaıanyń negizindegi bul kınotýyndy kınoteatrlarǵa laıyqtalyp, DCP formatyna kóshirilgen. Ony qandy maıdan kýágerleri, jeńis úshin kúresken jandar alǵash bolyp tamashalady, dep habarlaıdy 24.kz.
«Fılm jalǵyz Baýyrjan Momyshuly týraly emes, bul qan maıdanda sheıit ketkender de, búginde kóz tiri ardagerlerimiz de jaıly», - deıdi «Habar» Agenttigi» AQ bas prodıýseriniń orynbasary Arman Sqabyluly.
Kórsetilimge sondaı-aq batyr atamyzdyń atyndaǵy áskerı ýchılışe kýrsanttary men buqaralyq aqparat quraldarynyń ókilderi qatysty. Kartınadan erekshe áser alǵan ardagerler óz oılarymen bólisýge asyqty.
«Rasynda da ol uly adam bolǵan. Ondaı tulǵa biren-saran. Mundaı tulǵalar týraly fılm túsirý óte mańyzdy», - deıdi soǵys ardageri Satybaldy Totanov.
Búgingi kezdesýge Baýyrjan Momyshulynyń nemeresi Erjan Momyshuly da shaqyryldy. Asyldyń tuıaǵy batyrdyń ómirin ásireleýsiz, shynaıy kórsete bilgen shyǵarmashylyq toptyń eńbegine rıza ekenin aıta kele, atasynyń «gújildek daýsymen ertegi aıtatyn meıirimdi jan ekenin beınelese, onyń beınesi tolyq ashylar edi» degen oıyn bildirdi.
«Osy bastamaǵa sebepker bolǵan «Habar» agenttigine úlken rahmetimdi aıtqym keledi. Fılm tolyqmetrajdy, serıal da 1941 jyldyń qazan aıymen aıaqtalǵan. Endi sonyń jalǵasy túsirilse eken degen tilegim bar», - deıdi Baýyrjan Momyshulynyń nemeresi Erjan Momyshuly.
Aıta keteıik, qazaq halqynyń qaharman uly ári kórnekti jazýshysy týraly týyndy mamyrdyń 8-i men 15-i aralyǵynda Sevastopolde ótetin H-shy halyqaralyq kınofestıvalge qatysyp, «Jeńiske birge jettik» atalymy boıynsha 100-den astam shyǵarmalarmen birge baq synaıdy.
